دهرې ټپې شاته يوه كيسه  شته

دپښتو ټپه دپښتو ادبياتو اوفرهنگ  يوه ستر سوغات دى . دا سوغات هم پښتو ژبه له نورو هغو بيلوي او هم ورته امتياز وركوي . پښتو ټپه بايد يوازې ديو ساده شعر او  كلام او يا عبارت په توگه ونه پيژندل شي  بلكې په همدغه كلام  كې دانسان د پټو مكنوناتو او  كله هم دپټو ارزوگانو  چې په پښتني ټولنه اوفرهنگ كې ”تابو“ گڼلي شي ، خو په ټپه كې را برسېره كيږي . ټپه يوازې يو استيتيكي  كلام نه دى نه يوازې ښايست  اوښكلا منعكسوي او نه يې پنځوي.بلكې ډېر څه لري . څو بيلگې :

راشه دا خپل تصوير سمبال كه

په ما دژمي شپه په ويښه تيروينه

دا به له ما نه پوره نه شي

چې هر ماښام دې په جرگو پخلا كومه

ماويلي زه به ورته ژاړم

جانان له كوره سترگې سرې را وړې دينه

بخته دخداې دپاره ويښ شه

څوك تر قيامته پورې نه كوي خوبونه .

ټپه تر هر څه له مخه دعشق  پيغام ليږدوي . ټپه دعشق تابلو هم ده . دعشق دغه تابلو دموسيقي په اوږو خپل خوندور سفر كوي . خو موسيقي  چې اوس د په اصطلاح ددوگم اودتحجر نظام په وسيله منع ده . نو له بلې لارې را بهر كيږي اوهغه دترنم لاره ده ، دنوى تكنالوژي په مټ  موسيقي دترنم لاره غوره كړې ده ، زياتره ځوانان په گډه ټپې په سيالي سره زمزمه كوي . تحجر له مينې اوعشق نه بيزاره دى . ځكه عشق اومينه انساني اروايي پديده ده . حيوان په مينه نه پوهيږي . يا يوه ټپه دا هم ده .

موزي په مينه نه پوهيږي + په گيډه يې موړكه تر سبا كوي خوبونه

دعشق مساله په تيولوجي يا الهياتو، عرفان او  اروا پوهنه  كې توپير لري . كله  چې انسان دواقعي عشق نه بي برخي شو نو دعشق تصور يې په عرفان كې وليده .  چې په متقابله توگه هغه ته حقيقي او دا بل ته مجازي وايي . اصلن دارواپوهني  له نظره خبره بالعكس يا سرچپه ده .

پورته ټپې يو په يوه نه شنو ، بلكې په كليت كې  په دوى كې دهرې ټپې شاته يوه كيسه شته ، دا كيسه كله په نوستالژيك ډول اوكله دتداعي اوبيا ذهن ته را تلو له لاري اوكله هم دتحت الشعور څخه دراولاړيدو  او راپورته كيدو له لاري ليدل  كيږي . هره ټپه يو ډول پراگماتيك مفهوم وړاند ې كوي  . كه له يوې خوا عملي كيسه ذهن ته راوړي ،نو له بلې خوا دروان سره تړاو لري . ناهيلي او تېر ارمان انتقال ته هم اوږه وركوي .  دلته ځيني مسايل داسې هم دي  چې دشعر په ژبه يو ايديالي مفهوم ته  تجسم وركوي ، لكه بخت چې دويښيدو ورته وايي . په هر صورت ټپه كيسه لري ، تجسم لري عملي لړۍ منعكسوي ، مينه اوعشق ځلوي اونور . كيداى شي په راتلونكي كې نور څه هم را برسېره او وشنو . خو داوس له پاره همدومره .