د شهید ګیله من افغان وزیر په شهادت ویر

د شهید ګیله من افغان وزیر په شهادت د افغانستان د جمهوري غوښتونکي خوځښت ویر

د ملي ماتم او ژورې خواشینۍ په شېبو کې خبر راورسېد، چې د پښتونژغورنې د غورځنګ یو فعال مبارز، شاعر او افغان ولس ته یو محبوب ځوان ګیلامن افغان وزیر له هغو ټپونو څخه، چې د افغان ولس دوښمنانو وررسولي وو، شهید شو.

انالله و اناالیه راجعون

په معاصر تاریخ کې ډېر کم کسان د دغه مظلوم شهید ملي محبوبیت ته رسېدلای شي. شهید ګیلامن د ریښتینې ملي مبارزې یوه عظیمه الګو او تاریخي نښه ده. ده په هغه ارمان او هدف سر کېښود، چې د دوښمن د خوني سترګو تر وړاندې یې تر بل هرچا په اوچت او رسا غږ راپورته کړی و.

ده تر پایه د افغانانو د ملي بیرغ پرتم هسک وساته، د ژوند تر وروستۍ سلګۍ پورې یې د افغانژغورنې او ویښتیا غږ پورته کړ. ده د شعر، وینا، ترنم او هرې بلې اغېزناکه وسیلې په مټ د ولس د یووالي، راخوځولو او په خپل برخلیک حاکمولو لپاره مبارزه وکړه او دا دی د همدې لارې شهید شو.

خوځښت ټول افغان ولس، ملتپالو ځوانانو او د ګیلامن په ویر هرغمجن هېوادوال ته د دغه نومیالي مبارز د ارمانونو د تداوم او د هغه راپیل کړې مبارزې د غځولو غږ کوي. موږ باور لرو، چې که د افغانانو د ژغورنې لپاره له استبداد، تحجر او اوسمهالي ښکېلاک سره د یوې عملي مبارزې او ولسي پاڅون په لاره کې هرګام اخلو هماغومره به د شهید ګیلامان اروا ارامه او خوښه ساتو.

موږ د هغه له ټولو خواخوږیو غوښتنه کوو، چې د ریښتیني دوښمن په پېژندنه او عدالت ته ورسپارنه کې هڅه وکړي، خو په پوره هوښیارۍ دا هم په پام کې ولري، چې ټولو افغانانو ته د دغه محبوب مبارز د وژنې ښکېلاکي دسیسه دوښمن ته دا موقع ورنه کړي، چې خدای مه کړه په افغانانو کې بدۍ او دوښمنۍ ته لمن ووهي.

موږ په داسې شېبو کې، چې د ګیلامن ویرجنې کورنۍ، د پښتونژغورنې مشرتابه، ملګرو او ټول افغان ولس ته په دغو غمجنو شېبو کې تسلیت وایو، ډاډ ورکوو، چې د یوه هملاري او همفکره ملي خوځښت په توګه په ټول توان د دغه ویاړلي شهید ارمانونه پالو او لاره به یې روښانوو.

خدای دې وبښي، اراو یې ښاد!