د ماشوم تر مخ خو به موبايل نه کاروئ؟/ ډاکټر نويد خپلواک

ورځنیو مصروفیتونو اکثریت مور و پلار له اولادونو لېرې ساتلي دي او د اولادونو لویه هیله دا وي چې پلار به یې ماښام راځي او دوی به ورسره غورې کوي، د دفتري مېرمنو اولادونه هم ورته هیلې لري.
په تازه کې د بوسټن میډیل سنټر له لوري په یوې څېړنه کې ښوول شوې چې د ماشومانو په موجودیت کې ځانونه له موبایلونو سره مصروفول د ماشومانو په ذهن منفي اغېز پرېباسي.
ماشومان په مور و پلار حق لري او دا د والدینو مسوولیت دی چې خپلو اولادونو ته هم وخت ورکړي، خو د ټولنیزو رسنیو مصروفیتونو مور و پلار له ماشومانو لېرې کړې دي او د څېړنې د مالوماتو په اساس ورځ تر بلې دغه فاصله مخ په زیاتېدو ده.
ډاکټران وایي، که څه هم دا ډېره ستونزمنه ده چې د هوښیارو موبایلونو په زمانه کې دي څوک د دې وسایلو له کارولو منع شي او د مالوماتو له تر لاسه کولو دې محروم شي، ځکه هره شېبه تازه مالوماتو ته اړتیا وي، خو والدینو ته توصیه کوي چې د کارولو لپاره یې مهالوېش ولري او له کاره کور ته د ستنېدو پر مهال په تېره بيا ماسختن چې ماشومان د مور و پلار مینې ته انتظار وي باید دوی د برېښنایي وسایلو له کارولو ډډه وکړي او دا وخت خپلو ماشومانو ته ورکړي.
ډاکټر جیني راډسکي وایي، د ماشومانو په مخکې له موبایلونو سره مصروفیت د هغوی پر اخلاقو هم منفي اغېز کوي او دغه شان ماشومان ډېر سپین‌سترګي لویېږي.
څېړونکې ډله سپارښتنه کوي چې که په دې وخت کې له ټلویزیون سره هم ځان مصروفوئ، باید داسې پروګرامونه پکې وګورئ چې ماشومان یې هم درسره ولیدلای شي.
له دې سره د مور و پلار دغه کار ماشومان د هوښیارو موبایلونو کارولو ته تشویقوي او په کم عمر کې د موبایل کارول د ماشومانو روغتیا ته جدي زیان اړوي.
همدا ډول د مور و پلار په دې کار سره ماشومانو ته دا خبره یقیني کېږي چې مور و پلار ته کوم اهمیت نه لري او هغه څه چې غواړي هغه ترسره کوي.
څېړونکې ډله وایي، د مور و پلار له لوري له هوښیارو ټلیفونونو سره مصروفیت د دوی د وخت سیسټم هم ګډوډوي چې په دې سره ماشومان زده کوي چې وخت چندانې مهم نه دی او دا د دوی راتلونکي ژوند ته سور څراغ دی