د چا شخصي حریم کې مداخله مه کوئ…! /محمد تمیم رحیم زی

د خپل ځان یا ډلې اړوند اطلاعات جلا کول او نورو ته د هغې د ښودلو/نه ښودلو په هکله تصمیم نیول، شخصي حریم دی. دلته بیا د حریم پولې بېلې دي، چې فردي حریم او سازماني(موسسه، ټولنه، بهیر او په ټوله کې هېواد) حریم دی؛ چې دلته د فردي حریم یو-څو ټکو ته اشاره کوو.

هغه بله ورځ مې د ټاکنیزو ټیمونو یو تلوېزیوني بحث کتو، درې ښځې یې کښېنولې وې چې هرې یوې به یې د خپل ټیم برنامه توضیح کوله، خو یو وار په خپلو کې سره واوښتل او د یو بل په شخصي حریم یې لفظي برید وکړ؛ پداسې حال کې چې که چېرې منطقي غږېدلي وی هېڅ د دې اړتیا نه وه چې یو-بل وګواښي.

دوی په خپل منځ کې ستونزه نه درلوده؛ اصل هدف د خپل ټیم ځواب دی چې باید شوی وی، خو متأسفانه ځینې وخت ځینې خلک داسې انګیري چې ښايي ټول موارد د دوی مربوط کېږي او هره خبره ځان ته کشوي.

اوس تازه د ټاکنو موضوع ډېره توده ده، هر څوک د دې حق لري چې خپل ځانګړی انتخاب ولري؛ په نورو د خپل انتخاب تحمیل سم کار نه دی. زه دلته یو ټکی جدي یادوم هغه دا چې ملګري باید د سیاسي جوړ-جاړیو لپاره خپله ملګرتیا قرباني نه کړي، ځکه دا چاره هېڅ د دې ارزښت نه لري.

هر لوری باید فکري او شخصیتي استقلال ولري، هر څوک د دې حق لري چې خپل شخصي نظر ولري؛ خو د نظر ورکړه باید د یو لړ ټولنیزو اصولو پر بنسټ وي. د اصولو رعایت د دې لامل کېږي چې د بل چا په شخصي حریم کې مداخله ونه کړئ، د ټولنیزو قواعدو رعایت باید له خپله ځانه پیل کړو څو ورځ تر بلې په ټولنه کې د ټولنیز نظم د ټینګښت لامل شي.

انګلېسي کې یوه اصطلاح ده “Go out mute mode”، چې ژباړه یې داسې ده”له غیرفعاله یا چوپتیا حالته ځان وباسئ”.

مانا دا چې کوښښ وکړئ ټولنه کې مثبت فعاله حالت ولرئ، لوی او خلاص فکر ولرئ، د مثبتې پنځونې په لټه کې اوسئ، له تېروتنو درس واخلئ-له تکرار یې مخنیوی وکړئ، د نظم لپاره کار وکړئ او د بې نظمیو د مخنیوي په برخه کې نوې برنامې جوړې کړئ-داسې برنامې چې خلک په اسانه وکولای شي عبرت ترې واخلي.

د هر چا هر شی په هغه پورې تړاو لري او د هغې په هر راز پسې نه ګرځېدنه د سړي شخصیت ښيي.

له خلکو سره ښه اړیکه درلودل، د خپلمنځي ستونزو نشتون، د چارو سمون، د فکر ارامتیا، ښه ګومان، مثبت نګري او غالب شخصیت د روغ ژوند نښې دي؛ چې دا ژوند په اسانۍ سره نه ترلاسه کېږي ځکه یو څه منډې-ټرنډې باید پکې متحمل شو.

دا چې اسانه ترلاسه کېږي، که سخت؛ د دې په تړاو د سړي خپل فکري تمرکز مهم دی چې کومې خواته یې اړوي، خو په ټوله کې د ترلاسه کېدلو وړ دی.