تر اولاد دنده مقدسه دی

د افغانستان رسنیو کې هغه تصویر او کیسه ډیره خپره شوه چې پکې د یو سرتیري د زوی کیسه انځور شوې وه.

د حشمت الله په نوم یو سرتیری چې هلمند کې دنده لري، زوی یې د ستوني ناروغي درلوده او تیرې څه مودې راهیسې سخت ځوریده.

حشمت له خپل اته کلن زوی عنایت سره ژمنه کړې وه چې هر کله کابل ته راشي، نو درملنه به یې کوي.

دوه اوونۍ وړاندې حشمت کور ته راځي، کورنۍ یې ښه راغلاست ورته وایي، حشمت له یوې ورځې دمې وروسته د زوی د عملیات تابیا کوي، روغتون ته یې وړي او تر تشخیص وروسته د عملیات ضرورت پيدا کیږي.

کله چې حشمت الله خپل زوی عنایت الله د عملیات خوني ته وړي او بې هوشي ورکوي، سرتیري ته له هلمند زنګ راځي چې وضعیت ښه نه دی، جګړه ده او باید دندې ته ستون شي.

حشمت الله هملته د زوی د ناروغي په بستر باندې زوی ښکل کوي، یوه جمله ورته لیکي او د هلمند پر لور حرکت کوي.

د حشمت جمله خپل زوی ته داسې وه ( زه مې خپلې دندې ته ستنیږم چې هلمند کې ده، هلته وضعیت ښه نه دی او ماته ضرورت دی، تاته دې خدای شفا درکړي او دنده مقدسه ده.)

د حشمت الله دا سرښنده او له دندې او هېواد سره مینه تر رسنیو ورسیده او رسنیو پرې راپورونه وکړل.

په دې سره د ځینو هغو خبرو یو ځل بیا دروغ شوې چې ګنې سرتیري یواځې د پيسو لپاره دنده کوي او بل فکر او روحیه نه لري.

د افغانستان د امنیتي او دفاعي ځواکونو روحیه پياوړې ده او دا روحیه د پيسو لپاره نه بلکې د وطن لپاره ده.

دا د یو حشمت الله کیسه وه چې رسنیزه شوه، داسې سلګونه او حتا زرګونه کیسې شته چې فلمونه پرې جوړیدلی شي.

سرتیری که هر څنګه وضعیت کې وي، له دندې سره مینه یې په کور ارام ته نه پریږدي، او هر ډول وضعیت کې ځان دندې ته رسوي.

افغان امنیتي او دفاعي ځواکونه دنده تر بل هر مسوولیت مقدسه ګڼي او هغه قسم چې د دندې لپاره یې کړی دی، نه ماتوي.

تاسو به ځینې موارد په جګړه کې لیدلي وی چې ان سرتیري حاضر دي چې شهادت یې په نصیب شي، خو د پنجاب مزدورانو ته نه دي تسلیم شوي.

د سرتیرو لپاره دنده مقدسه ده او د هېواد او هېوادوالو د ساتنې لپاره هر ډول قربانۍ ته تیار دی.