تبلیغي جماعتونه د چا د کومو موخو لپاره کار کوي؟

له تاریخي اړخه که چیرې نږدې تیر ته کتنه وکړو، نو د اسلام مبارک دين د علمي کدري اشخاصو له لوري، چې په فقه، قانون، قضا او په ټوله کې په اسلامي شریعت به یې بشپړ واکمني درلودله او په دې ټولو برخو کې به یې تر لوړې درجې څو لسیزې زده کړې کړې وې د تبلیغ چاره پر مخ وړل کېده او که چیرې به کومه مسئله ورته نا څرګنده شوه، نو له لوی علمي مرکز یا دارالافتا څخه به یې ځواب غوښتلو. په همدې ډول د اسلام څلورم خلیفه حضرت علي کرم الله وجهه له دورې روایت را نقل شوی، چې یو چا په جومات کې تبلغ کاوه، نو امیرالمنین حضرت علي(رح) ترې وپوښتل، چې ته ناسخ او منسوخ سره بیلولای شې، چې تبلیغ کوې؟ هغه په ځواب کې ورته وویل، چې نه! نو ده مبارک ورته وویل، چې ځان دې هم تباه کړو او خلک هم او له دې سره یې هغه کس له جومات څخه وشړلو.

اوس اوس زموږ ستاسو په هېواد کې د تبلیغي جماعتونو ډلې ډلې له یو ولایت څخه بل ته، له یوې ولسوالۍ بلې ولسوالۍ او له یو کلي بل کلي ته تشکیلونه لري، چې ډیری مشران یې بشپړه ديني علمي پوهه نه لري او حتا لیک او لوست هم نه شي کولای. دوي په جوماتونو کې یوازې د لمانځه مسایل بیانوي او یو نالوستی یا نیمه لوستی پکې د جومات منبر ته پورته کیږي او ددوي په وینا شپږ نمبرې بیانوي. په داسې حال کې چې د جومات منبر د بشریت ستر لارښود او د اسلامي نړۍ خوږ پیغمبر او رهبر حضرت محمد(ص) ځای دی او د نالوستې ناسته یا ولاړه په دې مبارک ځای کې د اسلام دین ته په سپکه کتل دي. خو له دې سره سره بیا هم نه دیني رهبران او نه هم د جوماتونو ملا صاحبان ددوي مخه نیسي او نه ترې په دې تړاو پوښتنه کوي.

برسیره پر دې د تبلیغیانو په لویو تشکیلونو کې له هېواده بهر راغلي د همدوي په څیر مبلغین هم وي، چې یو شمیر خو یې خپلې کور ودانې، خوېندې او مېندې هم له ځانه سره ګرځوي او د اسلام دین د مبلغینو په نوم جومات پر جومات ګرځي، چې ددوي دا ډول خوځښتونه هېڅکله نه دي څارل شوي او نه هم ترېنه پوښتنې ګروېږنې شوي، چې څوک دي، له کومه ځایه راغلي، څه کوي او ولې یې د څه لپاره کوي؟.

په دې تړاو به د خپلې کاري تجربې یوه جالبه تاسو ته یاده کړم، چې د تبلیغي جماعتونو په اړه ډیر څه درته روښانه شي؛ نږدې ۹ کاله وړاندې د پاکستان استخباراتي ادارې پخوانی تقاعد شوی مشر کرنیل امام مړ ؤ او په دې تړاو مې د افغانستان مجاهدینو تنظیمونو له پخوانیو غړو یوه سره مرکه وکړه او د کرنیل امام په اړه مې ترې پوښتنې وکړې، چې څنګه شخص ؤ او د افغانستان برخه کې یې نظر او لیدلوری څه ؤ؟ جهادي مخور یو تفصیلي ځواب راکړو، خو یوه په زړه پورې یادونه یې دا وکړه، چې کرنیل امام د افغانستان په ډیری ولایتونو کې بلد او ولسوالیو  ته هم تللی ؤ. ما په حیرانتیا ترې پوښتنه وکړه، چې دا څنګه کېدای شي، چې د پاکستان استخباراتي ادارې مشر دې افغانستان ته راغلی وي او ډیر وخت یې دلته تیر او ګرځېدلی وي؟ هغه موسک شو او زیاته یې کړه، چې نه یوازې کرنیل امام بلکې سرتاج عزیز او د پاکستان ډیری پوځي استخباراتي مشران هم په ټول افغانستان کې د تبلیغ په تشکیلونو کې ګرځېدلي وو او کلي په کلي بلد وو.

نو دې بیلګې ته په پام سره ویلای شو، چې د تبلیغ مرکز د پاکستان په رېونډ کې دی او له هماغه ځایه لوی او واړه تشکیلونه هر ځای ته لیږي او هر څوک پکې د تبلیغي په نوم ګډون کوي او خپله ورسپارل شوې دنده که سیاسي وي او که استخباراتي پوځي په ډاډه زړه یې ترسره کوي.

پر دې سربیره تبلیغي جماعتونه د پردیو شر اچوونکو په مالي ملاتړ او مرسته هېواد کې د مسلمانانو دیني تفرقې لپاره کار کوي او د مذهبونو د یوې ډلې په تکفیرولو سره سترو اختلافاتو ته لمن وهي او خپلې شومې موخې پر مخ وړي، چې څرګنده بیلګه یې وهابیان او سلفیان دي، چې د شعیه مذهب پیروان کافر بولي او د داعش سترې مرګونې پروژې پر مخ وړي.

نو له دې ټولو دا پایله اخلو، چې تبلیغي جماعتونه یا تشکیلونه شومې موخې لري او د پردیو په لارښونه افغانستان کې نفاق اچولو، استخباراتي سترو موخو پلي کولو او د تروریستي ډلو زېږون ته لار هواروي او بنسټ یې ږدي. او د افغانستان دولت ته په کار ده، چې بشپړه مخه یې ونېسي او یا یې تر جدي نظارت لاندې راولي، څو د لا زیاتو پیچلو ستونزو پر رامنځته کولو بریالي نه شي او د دښمن ژرندې ته اوبه ور ډیرې نه کړي.