!طالبان: امریکا ته ژمن یو؛ د تړون ارزولو ته اړتیا نشته

طالبانو له امریکا سره د هوکړې ټولو مادو ته ژمنتیا ښودلې. دوی دا خبره د سپینې ماڼۍ د هغه پرېکړې په غبرګون کې کړې چې ویلي یې وو، د ټړامپ له ادارې سره د طالبانو د لاسلیک شوې هوکړې ارزول غواړي.

په قطر کې د طالبانو دفتر ویاند محمد نعیم د شنبې پر ماښام رسنیو ته وویل، چې د افغانستان د ستونزې د سیاسي جوړجاړي یوازینۍ لار، د ده په ټکو د دوحې د تړون پلي کول دي.

محمد نعیم زیاتوي: “د هوکړې د پلي کولو لپاره عملي ګام دا دی چې د افغانستان لانجه له سیاسي لارې هواره شي او بهرني ځواکونه د طالبانو د اسلامي امارت او امریکا د هوکړې له مخې له هېواده ووځي، موږ له خپل اړخه یو ځل بیا وایو چې د هوکړې د هرې مادې عملي کول د ټولو لپاره ښه کار دی، موږ هغو ژمنو ته ولاړ یو چې هوکړه کې مو کړې دي، له مقابل لوري هم غواړو چې هوکړه کې کړیو ژمنو باندې ودرېږي.”

له امریکا سره د دوحې په لاسلیک شوي تړون کې د طالبانو اساسي ژمنې دا وې چې تاوتریخوالی به کموي؛ پر بهرنیو ځواکونو به بریدونه دروي؛ له القاعدې او نورو نړیوالو ترهګرو ډلو سره به اړیکې شلوي او د افغانستان له خاورې به د امریکا پر ضد د استفادې اجازه نه ‌ورکوي.

دا په داسې کې ده چې که څه هم طالبان دغو خبرو ته ځان ژمن بولي، خو له دې وړاندې افغان چارواکو ادعا کړې چې طالبانو تاوتریخوالی نه‌ دی کم کړی او له القاعدې سره ‌یې هم اړیکې ساتلې دي، هغه ادعاوې چې طالبانو رد کړې دي.

لا تر اوسه معلومه نه ‌ده چې د امریکا نوې اداره به له طالبانو سره د هوکړې تړون څنګه او څه وخت وارزوي، خو افغان دولت د دې ارزونې هرکلی کړی دی.