د مطبوعاتو د ازادي ورځ؛ افغانستان کې د رسنیو پر وړاندې خنډونه

د ملګرو ملتونو عمومي ناستې په کال ۱۹۹۳ د دسمبر په شلمه د مې میاشتې دریمه نېټه د مطبوعاتو د ازادي په نوم ونوموله.

د مطبوعاتو د ازادي ورځ په لومړي ځل په کال ۱۹۹۱ د یونسکو په عمومي ناستې  کې د« نړۍ کې د مطبوعاتو ازادي» په نوم  په پرېکړه  لیک کې یاده شوې ده.

هغه مهال د یونسکو غړو هېوادونو په ډېموکراتو ټولنو کې د مطبوعاتو ازادي له اړینو اړتیاو څخه بللې او زیاته کړې یې ده، چې رسنۍ پرته له کوم فشار څخه په ټولنه کې خپلو فعالیتونو ته دوام ورکړي.

یونسکو د می میاشتې درېمه نېټه د مطبوعاتو د ازادي په نوم وړاندېز کړې وه.

یاده ورځ د ویندهوک خبرپاڼې، چې د خپلواکو او ټول شموله نشریو په اړه خپره شوې وه، ونومول شوه.

یاده اعلامیه د یونسکو او ملګرو ملتونو لخوا د نامیبیا په پلازمینه ویندهوک کې په ۱۹۹۱ کال د مې میاشتې په دریمه نېټه تصویب شوه.

باید یاده شي، چې په افغانستان کې په تېرو دوه لسیزو کې د مطبوعاتو د ازادي لپاره پراخ کارونه ترسره شوي؛ خو لا هم افغانستان د خبریالانو لپاره تر ګواښ ډک هېواد بلل کیږي.

افغانستان کې اوس مهال رسنۍ او د رسنیو کارکوونکي د طالبانو او یو شمېر نورو ترهګرو ډلو له لوري له جدي ګواښ سره مخ دي.

ډیری وخت خبریالان د حقایقو په راسپړلو کې خپل ژوند هم له لاسه ورکوي او که د چا ګټې یې ګواښ سره مخ کړې؛ نو په مستقیم او غیر مستقیم ډول یې ګواښي.

دغه راز افغانستان کې د مطبوعاتو پر وړاندې مافیا او ترهګرې ډلې تر ټولو لوی ګواښ بلل شوی دی.

افغانستان کې تېر میلادي کال د خبریالانو لپاره تر ټولو خونړی کال بللی شوی.

په همدې حال کې بیا رسنۍ، خبریالان، د خبریالانو ملاتړ بنسټونه او یو شمېر نورې ادارې د افغان سولې په خبرو کې له طالبانو غوښتنه کوي، چې د سولې خبرو کې دې د بیان ازادي نه قرباني کيږي او رسنیو ته باید دواړه لوري په پوره احترام قایل شي.