برکت او بریا څه دي

تر چې انسان ته پیسې او پرمختګ نه وي راغلي په آند یې برکت همدا وي چې ډېرې پیسې ولري لوی مقام او ځای ته ورسېږي خلک ورته سلام وکړي تل ورته ټیټ و پاس اوسي؛ خو کله چې دې ته ورسېږي؛نو ورته احساس وشي چې کله یې تنخوا یونیم سل روپۍ میاشت وه؛ لګښتونه یې الحمدلله ښه په اسانۍ او اطمنان سره ترسره کېدل او خپل د کور غړي یې هم تر یو بریده پاللی شول اوس چې یې معاش له لکونو اوړي؛ خو نه پوره کېږي سړی فکر کوي چې څه شوي دي هله ورته د زیاتوالي او برکت تر منځ توپیر محسوس شي او پوه شي.

زه اکثره خپلو خپلوانو او دوستانو ته دا نصیحت کوم چې تاسې پخپله ګټه وټه کې رب تعالی شریک کړئ د خپلو لاسته راوړنو یوه برخه ځانګړې کړئ او ووایئ چې دا زما د رب، چې زما شریکوال او پارټنر دی د هغه برخه ده ـ دا برخه د الله په بنده ګانو ولګوئ؛ خو داسې نه لکه ته یې چې مصرفوې دا غلطه ده،داسې مصرفول ناسم دي ـ  زما رب تر ننه له ما د غوښتلو پر مهال دا ونه پوښتل چې ته چې دا پیسې او شته غواړې دا په کومو ځایونو مصرفوې په دې پیسو نارواوې کوې ـ نه، نه ـ هیڅ نه پوښتي خدای هیڅ نه وایي په پټه خوله یې درکوي او همدا چلن د پیغمبر مبارک و ـ اوس نو دا ده که یو خو موږ الله تعالی خپل ملګری کړو او بیا دا برخه په داسې شکل ولګوو چې په هغو کې د دوست او دښمن توپیر ونه کړو البته د پیغمبر ټاکلې لار به په دې اړه حتما تعقیبوو؛ خو په هغې سربېره به دا تشخیص نه وي چې څوک دوست دی څوک دښمن ـ

ټول د خدای بنده ګان دي او موږ ته ځکه ګران دي چې زه هم د الله یو بنده یم چې هر چا یووړه ـ بیا وګورئ چې برکت څومره دی په رزق کې به زیاتوالی نه وي؛ خو برکت به بې بریده وي په خرچ کولو سربېره به درسره پاتې وي ـ

همدا راز د پرمختګ خبره ـ د دوه شخصیتونو مثالونه واخلئ د وخت د واکمن مقبره هم وګورئ او د وخت د درویش هم ـ په یوه به یوازې تشریفاتي حاضري کېږي او په بل به د دعاګانو تر څنګ د زرګونو بې وسو خیټې یو وخت هره ورځ مړېږي په داسې حالت کې سړی ویلی شي چې پرمختګ وغواړي که برکت ـ نو حتما به د الله دوستي غواړي چې د الله د دوستۍ له برکته یې الله تعالی په خلکو کې قدرمن او محبوب وګرځوي.