د افغانانو له پاره د بحث يوه ډیره مهمه موضوع

يوه ډیره مهمه موضوع چې باید بحث په وشي، په نوره نړۍ کې میشت افغانان او کارکوونکي دي، خصوصاً په اروپا، امريکا او کاناډا کې. له بده مرغه دغه افغانان، ځينې افغانستان میشت افغانان په ښه نوم نه يادوي، سګ شوی، تکسيوان، بشقاب شوی او په نورو نومونو يې یادوي. خو برعکس هغه پاکستانیان چې د پاکستان نه بهر په نورو هيوادونو کې کار کوي پاکستانیان يې د پاکستان د ملا تير او د پاکستانیانو د سترګو تور ګڼي. ځکه دغه خلک د خپل زیار او زحمت له کبله په کال کې ميليونونه ډالر د خپل هيواد او هيوادوالو سره مرسته کوي، بهرنۍ پیسې يې هيواد ته راځي او دلته يې هيوادوال په خپل ژوند او روزګار جوړوي. راځئ چې موږ هم لکه د نورو هيوادونو خپل هېوادوال چې په بهر کې دي ونازو او قدر يې وکړو، دوی هم افغانستان ته په ميليونونو ډالر راليږي او دلته له ډيرو هيوادوالو سره مرسته کوي، دغه افغانان لکه په هيواد کې میشت افغانان له خپل هيواد او خلکو سره مينه لري او په يو ډول نه يو ډول ورسره مرسته کوي. هغوی چې افغانستان ته د چور لپاره راغلي وو، او د افغانستان د نظام د تباهي سبب شو په دې ډله کې نه راځي، هغه لکه د افغانستان د نورو لنډغرانو سره هيڅ فرق نه لري، خو کوم چې زه يادوم هغوی واقعاً سپيڅلي خلک او د ځينو مجبوريتونو له کبله خپل هيواد پريښی دی، چې په دې ډله کې زموږ ستاسې خپل خپلوان، دوستان، کلیوال او نور راځی. همدغه هيوادوال دې چې د افغانستان په دې سختو شرايطو کې د افغانانو سره مرسته کوي او څومره چې يې له وسه وي، په افغانستان کې د بېوزلو لاسنیوی کوي.