ټولنه او بې ژبې حیوانات

 ډېرو ځايونه کې به مو له حيواناتو سره دناوړه چلند پېښې ليدلې وي. دبېلګې په توګه ، په کاڼو ويشتل په بېلابېلو چاودېدونکو توکو سره ځورولو ، په بېلابېلو طريقو سره دهغوۍ وژل.

تېره ورځ لاربنده وه، له موټرڅخه مې يو ماشوم ته پام شو چې له نالۍ څخه يې دسپي وړوکى بچاى را اوچت کړ او په خپل دسمال يې پاک کړ .

ګاندي وايي چې ديو قوم داخلاقو سويه له حيواناتو سره ددوئ له چلنده معلومولاى شو .

دماشوم پدې کار ډېر خوښ شوم .

ډاروين وايي ،چې دژويو انواع يوبل کنټرولوي ،اودغه توازن ساتل دژوند په ګټه دى . په اسلامي کلچر کې له ژويو سره نرم چلند داخلاقي برتري او کرامت ښووندويه ده ، په اسلامي کلچر کې دژويو سره دنرم چلند په اړه بې شميره روايتونه پيدا کولى شو ، دبېلګې په توګه ، په تصوف کې رفاعيه طريقه چې سيداحمد رفاعي ته منسوبه ده ، ويل کيږي چې کله به دنوموړي دجامو په پيڅکه پيشو ويده وه او دلمانځه وخت به شو ،هغه پيڅکه به يې دخپلو جامونه غوڅه کړه او چې دلمانځه نه به بيرته راغى او پيشو به پاڅېدلې وه ، نو بيرته به يې په جامو پورې وګنډله . په نورو ډېرو ټولنو کې حيواناتو ته دتقدس درجه ورکړل شوې ده ، دبېلګې په توګه په هندکې غوا دهندوانو په منځ کې د تقدس درجه لري ،او ورته دمور مقام ورکوي ، کله چې انسانانو کرنې ته مخه کړه ورسره بېلابېل ژويي هم اهلي کړل شول چې پدې ژويو کې يوه هم غوا وه ، دژوندنورامکانات کم و،نو په کرنيزه ټولنه کې دغوا ارزښت زياتو شو ، ځکه هندوانو ورته دمور درجه ورکړله . په تاريخ کې هندوانو او مسلمانانو دغوا په سر ډېرې شخړې کړې چې پکې ډېر انسانان وژل شوي ، هندوانو به دمناسبه نه ګڼله چې غوا دې قرباني شي اوپه برهمنو دې ظلم وشي، برعکس به مسلمانانو فرض کڼله چې په اختر کې دې غوا قرباني شي .په 19 پېړۍ کې کله چې انګريزانو په هنديرغل وکړ نو ورسره يې دغوا قرباني پيل کړه ،  ددې په اساس غوا دخلکو احساسات راوپارول او دهندوانو ديوځاى کيدلو وسيله شو ، غوا دهندوانو لپاره دديني هويت يوه نښه شو او دساتنې لپاره يې په ټول هيواد کې ټولنې رامنځته شوې .

په نورو هيوادنو کې ددې لپاره د ژويو دځورولو په خلاف قواننين جوړيږي ،ترڅو بې رحمي کمه او دانسان په زړه کې درحم توخم وکري .

  په نورو هيوادونو کې دسترو مجرمينو دقضيو له څيړلو وروسته معلومه شوې چې دسترجرمونو پيل يې په ماشومتوب کې دحيواناتو دځورولو څخه کړى ده . که خپلو ماشومانو ته دحيواناتو سره دنرم چنلد زده کړه ورکړو ، نو بيا ترې دانسانانو سره دنرم چلند هيله کولى شو.