په بایسکل راغلی ایرانی له افغانستانه پاکستان ته لاړ

د رحمت الله آزاد په نوم ایرانی بایسکل چلوونکی چې تر دې وړاندې یې له ۷۰ څخه ډېرو هېوادونو ته پر بایسکل سفرونه کړي، په افغانستان کې تر یوې میاشتې ګرځېدو وروسته نن د تورخم له لارې پاکستان ته ولاړ.
دغه بایسکل چلوونکي تېره ورځ په ننګرهار کې د اطلاعات او کلتور له رییس سره وکتل او نوموړي ته یې د سولې ځانګړی لیکلی پیغام ورکړ.
هغه پر نړیوالې ټولنې هم غږ وکړ چې په افغانستان کې دې د شته ستونزو له منځه وړلو په برخه کې همکاري وکړي.
«په لیکلي بڼه مې له نړيوالو څخه وغوښتل چې دا هېواد یواځې مه پريږدئ او خاصه پاملرنه ورته وکړئ، ځکه چې د دې هېواد خلک ډېر مينه ناک او مومن خلک دي او باید نړیوال یې له یاده ونه باسي »
یاد سېلاني چې ۶۴ کاله عمر لري، تقریباً میاشت وړاندې د اسلام قلا بندر له لارې هرات او بیا د افغانستان نورو سیمو کې تر ګرځېدو وروسته ننګرهار ته پر بایسکل سفر وکړ.
«تر اوسه مې ۷۰ هيوادونو ته سفرونه کړي، دا ځل مې تصميم ونيو چې افغانستان ته راشم، له يو مياشت راهيسې د ايران له خاورې څخه د اسلام قلا له لارې افغانستان ته داخل شوم له هغه ځايه هرات ته راغلم، بيا کابل ته راغلم او اوس دا دی ننګرهار ته راغلی يم»
د ننګرهار اطلاعات کلتور رياست وايي، تېر یو کال کې د ۷۰ په شاوخوا کې بهرني سیلانيانو د ننګرهار له بېلابېلو سيمو سیاحت کړی دی.
«دغسې سيلانيانو راتګ افغانستان ته او بالخوصوص ننګرهار ته دا مونږ نيک پال ګڼو، دا د دې سيمې او اسلامي امارات لپاره يوه لاسته راوړنه بولم او په ټولو سيلانيانو غږ کوو، چې افغانستان ته راشي او د افغانستان له ښکلاو خوند واخلي او د افغانستان د کلتور او خلکو نه نړۍ ته يو ښه مثبت تصوير يوسي»
ټاکل شوې چې نوموړی سیلاني په پاکستان کې تر ګرځېدو وروسته د بلوچستان له لارې بېرته خپل هېواد ایران ته ولاړ شي.