د ریاضي د آزموینې لپاره کوم ډول آماده ګي باید ونیول شي، چې په ښو نُمرو بریالي شئ؟ /سرور ستانکزی

بعضې زده کونکي د ریاضي د آزموینې لپاره یوازې د فورمولونو یادول کافي ګڼي، هو د ریاضي د فورمولونو یادول ضروري ده، مګر په حقیقت کې دا بسنه نکوي، د ریاضي تر ټولو ښه زده کړه د ډېرو تمرینونو حل کولو ته ویلی شو. لیکنه ډېره نه اوږدوم او اصلي موضوع ته راځم، د ریاضي د آزموینې د آمادګۍ لپاره څو توصیې لیکم.
اول. له آزموینې څخه مخکې د خپل یادښت ( نوټ ) کتابچه وګورئ، په صنف کې د استاد د سوالونو د حل ټول لیکل شوي یادښتونه ( نوټونه) تر نظر لاندې تیر کړئ، دا ځکه چې استاد همیش په صنف کې د ریاضي د درسونو د اړوند عنوان یا مهمو فارمولونو عمومي تشریح کوي، دا تاسو ته د درس عمومي لارې در زده کولو کې مرسته کولی شي.
دوهم. تاسو شاید د درسي دوران پر وخت کې د بعضو درسي عنوانونو د سوالونو په حل کولو کې ډېرې غلطۍ کړي وي، د اړوند درسونو د سوالونو په تمرینونو بیا کتنه وکړئ او د خپلې ضعف نقطې پیژندنه باید وکړئ، د خپلې د ضعف نقطې د حل لپاره پر همغه درس ډیر تمرین وکړئ.
دریم. مختلف خلک د یوې ستونزې د حل لپاره مختلف فکرونه لري، تاسو هم د خپل صنف بعضو نږدې ملګرو سره درسي ګروپ جوړ کړئ، تاسو چې په کومو درسونو کې ډېره ستونزه لرئ، همغه ستونزې له خپلو ملګرو سره شریکې او تشریح کړئ. دا دوه ګټې لري؛ خپل ملګري ته د درس تشریح ستاسو تجربه یا پر همغه اړوند درس ډاډ لا ډیرولی شي او تر څنګ یې حقیقت کې د یو او بل مرسته هم تمامیدلی شي.
څلورم. د پوره آمادګي څخه وروسته هڅه وکړئ چې د خپل صنف نږدې ملګري څخه آزموینه واخلئ، معنیٰ دا چې ته خپل ملګري ته او هغه دې تاته د یوې حقیقي آزموینې په ډول سوالونه برابر او حل ځنې وروسته د یو او بل ځوابونه وګورئ.