ملي پولیس نور مظلوم نه دی

تر همدا پنځه کاله وړاندې موږ د ډېرو داسې پېښو شاهدان وو، چې کله به ملي پولیسو پر واټونو او څلور لارو کې موټرو ته لاس ورکړ او د تالاشۍ په موخه به یې ودرول، نو زورواکان او غیر مسوول وسله وال او د دوی د بانډ ملګري به پسې را کوز شول او پولیس خوارکی به یې د واټ په منځ کې وواهه.

پرون پولیس ځکه بېچاره او مظلوم و چې چا یې پوښتنه نه کوله، ملاتړی یې نه درلود او نه هم پر پولیسو د باور اجماع رامنځته شوې وه، ځکه په ډېرو مواردو کې خلک د پولیسو په لاس لرلو مشکوک وو او داسې ګڼله چې دوی له غلو، جنایتکارو، قاچاقبرو او تروریستانو سره لاس لري او د موادو په لېږد او قاچاق کې ورسره مرسته کوي او یا حداقل د دوی مخه نه نیسي.

مګر له کومې ورځې چې ولسمشر غني واک ته ورسېده، نو له هغه وروسته نه یوازې ملي پولیس نور بېچاره نه وو، بلکې د دوی په ګډون ټولو امنیتي او دفاعي ځواکونو ته دومره پاملرنه زیاته شوه، چې هم د دوی تلفات کم شول، هم یې نهیلي له منځه لاړه، هم د دوی په لیکو کې فساد ختم شو او هم ورسره امنیتي او دفاعي ځواکونه په مسلکي او محاربوي لحاظ پیاوړي شول. د خلکو پام ور واوښت، د ولس باور ورباندې زیات شو او ټول ولس د خپلو امنیتي او دفاعي ځواکونو تر شا ودرېد.

د ولس او ولسمشر د ملاتړ له برکته زموږ پولیس نور بېچاره ګان نه دي، دوی خپل حیثیت او مقام لري او خپل وظایف چې د قانون تطبیق، د ټولنې نظم او د جرایمو مخنیوی دی، په ټول قوت ترسره کوي. حتی د وکیلانو موټرونه ودروي، د موټر تورې ښیښې یې سپینوي، د موټر او د وسلو د جواز پوښتنه ورڅخه کوي، بې جوازه وسلې او موټر ورڅخه ضبطوي.

د پولیسو د اقداماتو له برکته په ښار کې کافي نظم راغلی ، د تورو ښیښو والا موټر نه لیدل کېږي او د جرامیو کچه هم تر شپېته سلنه پورې راکمه شوې ده او د کابل ښاریانو رضایت ترلاسه شوی دی، دوی په دې برخه کې د پولیسو د لا ډېر جدیت او اقداماتو غوښتنه کوي او هغوی ته د هر ډول ملاتړ ډاډ ورکوي، نو که خدای کول ټولنه به کرار کرار د قانون د واکمنۍ، نظم او ثبات لورته ځان نږدې کړي او ډېر ژر به موږ د لا ښه نظم او امن شاهدان اوسو.