فارن پالیسي: شواهد ښیي ملاهبت الله په کرونا ناروغۍ اخته شوی

فارن پالیسي په یوه خپاره کړي مطلب کې د سولې پروسه کې د یو شمېر دخیلو طالب مشرانو له قوله لیکلي؛ په داسې حال کې چې دغه ډله سولې ته د رسېدو په څنډه کې ده، خو کرونا ویروس د دې ډلې په رهبرۍ کې ژوره ګډوډي رامنځته کړې ده. دغه راز دغه ګډوډۍ د اختلافاتو تر کچې هم ده او د سولې او جګړې پر سر یې د دوی مهمې څېرې سره وېشلې دي.

د دې خپرونې د معلوماتو پر اساس کرونا ویروس ګڼ طالبان مشران نیولي او په دغو کسانو کې د ملا عمر زوی ملا یعقوب هم شامل دی. ملا یعقوب ته دا مهال د ۱۵ ولایتونو امنیتي مسوولیتونه ور سپارل شوي او د پلار تر مرګ وروسته د هغه د ټاکل کېدو پر سر په رهبرۍ کې اختلاف هم دغه ډله پاشلې ده.

فارن پالیسي لیکلي، څو اونۍ وړاندې ملاهبت الله په ناڅاپي ډول د غونډو له رهبرۍ غایب شو او پر ځای یې دغه چاره سراج الدین حقاني ته ورپاتې شوه، خو تازه سراج الدین حقاني هم په کرونا ناروغۍ اخته شوی او ټېسټ مثبت راغلی دی. اوس د رهبرۍ ډېری غونډې هم نه کېږي او د سولې خبرو په دې حساس پړاوو کې طالبان د رهبرۍ له ګډوډۍ سره مخ دي.

تر دې وړاندې افغان حکومت او نړیوالې ټولنې د کرونا ویروس د خپرېدو له وجې له طالبانو د اوربند غوښتنه وکړه چې ټولو سیمو ته خواړه او درمل په وخت ورسېږي، هغه څه چې طالبانو رد کړي او د روژې په پای کې په کویټه کې د دې ډلې د عدلیې وزیر ملا ترابي هم کرونا وواژه.