د طالبان او حقاني شبکې تر منځ شدید اختلافات

نوید احمد څرک

غونډه په کویټه کې کونسل ګهرۍ او زرغون روډ ته څېرمه په کويټه سرینا هوټل کې د افغان سولې په تړاو تر سره کېده. لومړی خو دا، چې طالبانو ځکه ناستې ته دا ځای ټاکلی دی، چې په خپل منځ کې یې پر یو بل باور نه و. وېرېدل، چې کوم برید یا چاودنه و نه شي؛ پوځ د دوی د ډاډ لپاره سیرینا کويټه هوټل ورته خالي کړی وو.

په غونډه کې له پېښوره د راغلي حقاني شبکې پلاوي په سوله کې پر خپل مشرتوب او ریاست ټینګار کړی، چې له کويټې شورا یې یواځینی ملاتړی د ملا عمر زوی ملا یعقوب و. دا کار د کويټې شورا د غړو له سخت غبرګون سره مخ شو.

د غونډې یو ګډونوال وايي د کويټې شورا یو غړی ودرېده او پرلپسې یې د حقاني ډلې کمزورۍ او د کويټې شورا اتلولۍ بیان کړې.

ملا یعقوب، چې د حقاني شبکې پلوي دی په هماغه ځای یې د حقاني شبکې ملاتړ کړی او د کویټې شورا کوم غړي ته یې سپکې سپوري ویلې دي.

تر منځ یې پوځ ښکېل شوی او دوی یې بېل کړي. د باندې په راوتو کې د کويټې شورا ځینو غړو پر پوځ او له پېښور پر راغلي پلاوي ډزې کړې. ویل کېږي، دا چې دوی په زري موټرو کې و کوم زیان نه دی وررسېدلی.

اوس د پاکستان پوځ د امریکا په اشارو د دوی تر منځ منځګړیتوب کوي؛ خو د کویټې شورا غړو ټینګار کړی، چې په افغان سوله کې به د حقاني ډلې ریاست و نه مني.

دا لومړی ځل ندی چې د طالبانو تر منځ د جدي اختلافاتو خبرونه ورکول کیږي.