د ناټو ایتلاف: د افغانستان امنيت لپاره زموږ ژمنه لا پرځای ده

د ناټو ایتلاف ويلي چې په افغانستان کې د امنیت د خونديتوب لپاره د دوی ژمنه لا پرځای ده؛ خو هڅه کوي چې د سولې په درشل کې په افغانستان کې د تاوتريخوالي کچه را ټېټه شي.
د ناټو سر منشي ینس سټولټنبرګ دا څرګندونې نن دوشنبه د “میزان ۲۸” مه کړې او ټينګار يې کړی چې ناټو به د افغانستان د امنيتي او دفاعي ځواکونو د تجهیز او ملاتړ په برخه کې خپلې روانې هڅې چټکې کړي. سټولټنبرګ ويلي: ” له افغانستان سره زموږ اصلي ژمنه امنیت دی او په دې ژمنه به ټينګ ودریږو.”
افغان حکومت هم د ناټو له دغو څرګندونو هرکلی کړی او ويلي دي چې افغانستان به خپل نړيوالو متحدينو ترڅنګ د سیمه ییزې ترهګرۍ پر وړاندې مبارزه کوي او هېڅکله به اجازه ورنکړي چې ترهګر د افغانستان له خاورې څخه نورو هېوادونو ته ګواښ جوړ کړي. صدیق صديقي په همدې اړه په خپل وروستي ټويټ کې ليکلي چې د افغانستان امنيتي او دفاعي ځواکونه همدا مهال له ترهګرۍ سره په جګړه کې د افغانستان او سیمه ییزو هېوادونو له مشترکو ګټو څخه دفاع کوي. نوموړي ويلي چې د افغانستان دولت د ناټو ایتلاف له معنا لرونکي ملاتړ څخه هرکلی کوي.
دا په داسې حال دي چې په ورستيوکې د سولې د هوکړې خلاف یوځل بيا په افغانستان کې د طالبانو د بريدونو کچه لوړه شوې او د امریکا متحده ایالاتونو ځانګړی استازی ګواښ کړی چې د تاوتريخوالي له لارې د امتیازاتو غوښتنه، خطرناک کار دی او تېرې تېروتنې تکرارولی شي.