د غور برید او د طالبانو هدف

غور ولایت کې د یکشنبې په ورځ موټر بم برید وشو چې له سلو زیات کسان یې ټپيان کړل او شاوخوا ۱۵ یې شهیدان کړل.

دا موټر بم برید امنیه قومندانۍ سره نږدې وشو چې شاوخوا ملکي وګړي یې ان په کورونو کې ټپيان کړل.

د دې برید اکثریت قربانیان ملکي وګړي و چې انځورونه یې خواله رسنیو کې لاس په لاس شوي و.

هغه مور چې په وینو ککړه وه، تر ټولو دردوونکی ویډیو او انځورونه یې خپاره شول چې د افغانستان د میندو د قربانیو کیسه یې کوله.

له دې برید طالبان منکر شول او لامل یې دا دی چې طالبانو له امریکا سره هوکړه کړې او بیا ترې امریکا ناراضه کیږي.

نو ویلی شو چې طالبان د خدای رضا ته نه ګوري، خو نه غواړي چې امریکا ترې ناراضه شي.

دا لومړی برید نه دی چې له امریکا سره تر هوکړې وروسته يې طالبان کوي، بلکې تر دې وړاندې ورته بریدونو کې سلګونه کسان قربانیان شول چې طالبانو یې مسوولیت و نه منه او امریکا ته یې سپيناوی ورکړ چې دا بریدونه دوی نه کوي.

جالبه همدا ده چې طالبانو امریکا او نړۍ ته ډاډ ورکړی چې په افغانستان کې تر دوی پرته نورې ترهګرې ډلې نشته، نو چې نورې ډلې نشته، بیا دا ډول بریدونه څوک کوي چې ملکیان یې قربانیان دي.

خو یو څه چې ښکاره دي، هغه دا چې د طالبانو نظامي او سیاسي ډلې په بیل نظر دي او له یو بل سره همنظره نه دي.

دوی خپل منځ کې سخت جنجالونه لري، خو دا جنجالونه رسنیز شوي نه دي او هڅه کیږي چې پټ وساتل شي.

تاسو د هلمند په جګړه کې د دوی متضاد نظرونه واوریدل چې د لښکرګاه د سقوط لپاره طالبانو جګړه پيل کړه او ناکام شول، خو سیاسي دفتر یې وویل چې دوی د لښکرګاه د نیولو عملیات نه کول، بلکې د خلکو د ارامتیا لپاره یې جګړه وکړله.

طالبانو د هلمند جګړه د خلکو ارامتیا لپاره وبلله، خو د مالوماتو له مخې ۱۰ زره کورنۍ چې ۴۰ زره کسان کیږي له دې جګړې بې ځایه شوي دي.

طالبان یا خپلمنځي جنجالونه لري، نظامي ډله یې له سیاسي ډلې سره پر لار نه ځي او یا داسې ده چې طالبان غواړي د ملکي وګړو په شهادت سره پر حکومت فشار راوړي چې د مذاکراتو په میز باندې د طالبانو ټولې غوښتنې ومني.

خو یو څه ښکاره دي چې افغانان کلونه نور د جګړې دوام غواړي، خو په کابل بیا د اسلام اباد حاکمیت نه غواړي او که په دې لار کې هر څومره قرباني ته ضرورت وي، افغانان تیار دي چې ور یې کړي.

مذاکرات د جګړې د بس لپاره دي، داسې بس چې د افغانانو له غوښتنې سره سم وشي، او مذاکراتي پلاوي افغانستان شموله غوښتنې او وړاندیزونه له ځان سره وړي دي.