د کمال خان بند، ۷۰۰ کلنه هیله چې پوره شوه

د کمال خان د اوبو او برښنا بند چې اوه سوه کاله وړاندې طرحه جوړه شوې وه، څو ورځې وړاندې بشپړ شوی او د اوبو د مدیریت جوګه شو چې کمو ورځو کې پکې زیاتې اوبه راټولې شوي دي.

د دې بند لپاره زیاتو حکومتونو هڅې کړې وې چې بشپړ شي او دې ولایت کې اوبه مدیریت شي، خو هیڅ حکومت پرې نه و توانیدلی چې دا د اوبو او برښنا بند بشپړ کړي.

بالاخره ولسمشر غني په مشرۍ حکومت کې د دې بند لپاره قوي اراده رامنځ ته شوه او چټک کار وشو چې اوبه یې مدیریت شوې.

د کمال خان بند نیمروز ولایت کې دی، د دې ولایت اکثریت دښتې له تندې سوځیدلي خو اوبه یې ایران ته خپلسري ډول باندې مفته روانې وې.

ایران هم پوره هڅه وکړه چې د دې بند د چارو مخنیوی وکړي، خو افغان سرتیرو د وینې او سر په بدل کې د دې بند له چارو ساتنه او څارنه وکړه او بالاخره افغانان یې اوه سوه کلنو هیلو ته ورسول.

ایران هیڅکله نه غواړي چې له افغانستان څخه ورتلونکي اوبه مدیریت شي، ځکه ایران انديښنه لري چې که د افغانستان اوبه سمې مدیریت شي، د دوی ځمکې به له تندې وسوځویږي.

ایران تیل لري او افغانستان اوبه، د ولسمشر غني دا شعار دی چې ایران دې تیل راکړي چې اوبه ورکړو.

هو، افغانستان له ایران سره د اوبو توافقنامې لري، خو ایران کلونه د افغانستان له جګړې او بې ثباتۍ ناسمه ګټه اخیستې او د افغانستان اوبه پرته له توافق ور روانې وې چې دا هېواد پرې ناسم اموخته شوی دی.

ایران باندې چې اوس اوبه بندیږي، یا په بله اصطلاح چې اوبه ورته له توافق سره سمې ورځې، هیڅکله داسې نه غواړي ، ځکه ایران د افغانستان په اوبو خړوبه دی او کله هم تیار نه دی چې اوبه پرې کمې شي.

که افغانستان کې ثبات راشي، ډير هېوادونه مجبور دي چې افغانستان ته کیني او اوبه ترې د یو څه په بدل کې وغواړي، خو دا چې دلته کورني دښمنان یې پیدا کړي، بهرني هېوادونه د افغانستان له شتمنیو مفته ګټه اخلي.

که افغانان سره متحد وي، داسې ډیرې ورځې به وګورئ چې اوبه مدیریت شي، کانونو خپلسرې کیندې بندې شي او او نور تر ځمکې لاندې د افغانستان شتمنۍ چې هیڅ ګټه ترې نه ده اخیستل شوې، د ګټې اخستنې وړ شي.