د امریکا کانګرس د بهرنیو اړیکو کمیټې لوړپوړي چارواکي مایکل مک کال ویلي چې خلیلزاد سیمې ته د طالبانو او واشنګټن تړون د تعدیل په موخه سفر کړی دی. خلیلزاد همدا پرون له ولسمشر غني او ډاکتر عبدالله سره ملاقات درلود.
د امریکا کانګرس د بهرنیو اړیکو کمیټې لوړپوړي چارواکي مایکل مک کال له امریکا غږ سره په یوه مرکه کې ویلي دي چې د افغان سولې له پاره د امریکا متحده ایالاتو ځانګړی استازی، زلمی خلیلزاد به په خپل تازه سفر کې د طالبانو او واشنګټن ترمنځ د سولې تړون د تعدیل هڅه وکړي.
د امریکا غږ خبریال جیف سیلدین پر خپله ټویټر پاڼه د امریکا غږ د معلوماتو پربنسټ لیکلي دي چې خلیلزاد به له طالبانو وغواړي څو له افغانستانه د امریکايي ځواکونو د اخراج نهايي نیټه لا پسې وغځوي.
د قطر په پلازمینه دوحه کې د طالبانو او واشنګټن ترمنځ د لاسلیک شوي تړون له مخې، امریکا متحده ایالات اړ دي چې د مې میاشتې تر لومړۍ نیټې مخکې له افغانستانه خپل سرتیري وباسي، داسې یو اقدام چې په دې وروستیو کې یې د امریکا له لوري د ځنډولو خبر ورکړل شوی دی.
جیف سیلیدن پر خپله ټویټر پاڼه د کانګرس د غړي مک کال په حواله ليکلي دي چې خليلزاد به د تړون د تعدیل غوښتنه وکړي، څو [طالبان] د مې میاشتې تر لومړۍ نیټې وروسته هم [په افغانستان] کې د امریکا حضور ومني.
پر امریکایانو نه برید خو افغان وژنه ادامه لري
د امریکا د کانګرس د بهرنیو اړیکو کمیټې دغه جګپوړي غړي همدا راز امریکا غږ ته ویلي دي چې د امریکا او طالبانو ترمنځ اوسنی تړون یوازې پر امریکايي عسکرو باندې د بریدونو مخنیوی کوي. د نوموړي په خبره، که څه هم طالبانو د تړون دغه برخه عملي کړې، خو بيا يې د ملکي افغانانو او پوځيانو له وژلو لاس نه دی اخیستی.
د جیف سیلیدن د ټویټ پر اساس، مک کال همدا راز هیله څرګنده کړې ده چې د افغان سولې له پاره د امریکا ځانګړی استازی به له طالبانو سره په شوي تړون کې داسې تغیرات راولي څو د تاوتریخوالی مخنیوی د افغان ملکیانو او پوځیانو په برخه کې عملي شي.
د امریکا د کانګرس دغه غړي همدا راز امریکا غږ ته ویلي دي چې طالبانو په افغانستان کې ډېر ماشومان، میرمنې او ملکیان وژلي او عسکر یې هم په نخښه کړي دي. د هغه په باور اوربند داسې موضوع ده چې دواړه لوري پرې توافق ته رسیدلی شي.
مک کال په داسې حال کې دغه څرګندونې کړي دي چې همدا اوس د افغان سولې له پاره د امریکا ځانګړی استازی زلمی خليلزاد د سیمې په سفر وتلی او تر اوسه پورې یې د ولسمشر غني او ډاکټر عبدالله په گډون له ډېرو افغان سیاستوالو سره د سولې په تړاو خبرې کړي دي.
بل لوري ته د افغان حکومت او طالبانو ترمنځ د دوهم دور مذاکرات هم د تمې خلاف ډیر پڅ روان دي.
په دې ترڅ کې بيا افغانان هره ورځ تاوتریخوالي، بمي چاودنو او هدفي وژنو اندیښمن کړي دي. همدا نن په ننګرهار کې د نامعلومو کسانو له لوري د یوه محلي تلویزیون خبریالاني وژل شوي دي.
په ننګرهار کې يوې حکومتي سرچینې دويچه ويله ته وويل چې د انعکاس تلوېزيون درې تنې کارکوونکې، مرسل، سعیده او شهناز په یوه وسله وال برید کې وژل شوي او یوه بله ولسي مېرمن ژوبله ده.
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
