جک سلېوان: پاکستان سره مو د پوځي اډو جوړېدو په اړه خبرې کړې

د امریکايي سرتېرو تر وتلو وروسته افغانستان کې د ترهګریزو ډلو ځپلو په موخه پاکستان سره د اډو جوړولو په اړه ګټورې خبرې شوې دي.
د امریکا د ملي امنیت سلاکار جک سلېوان په خپلو تازه څرګندونو کې ویلي، چې دوی له پاکستان سره په پوځي، استخباراتي او دېپلوماتیکې کچه خبرې کړې؛ څو افغانستان یو ځل بیا د ترهګرو ډلو په پټنځایونو بدل نه شي.
نوموړي په دې اړه له ډېرو معلوماتو ورکولو ډډه کړې او ویلي یې دي، چې ترڅو یوې هوکړې ته نه وي رسېدلي؛ نو یاده مسئله به په پټه توګه مخته یوسي. 
سلېوان په داسې حال کې دا څرګندونې کوي، چې د پاکستان د بهرنیو چارو وزیر شاه محمود قریشي په خپلو تازه څرګندونو کې ویلي، چې پاکستان ته به د امریکايي سرتېرو اډو جوړولو ته هغه مهال اجازه ورکړي، چې د دوی ګټې په کې نغښتې وي.
نوموړي ویلي، چې پاکستان د افغان سولې پلوي دی او په یاده پروسه کې مهم رول لوبولی شي.
قریشي زیاته کړې، چې تر اوس مهال امریکا سره د اډو جوړولو په برخه کې هېڅ تړون نه دی امضا شوی؛ خو د پاکستان ګټو ته په کتلو به یوې هوکړې ته ورسیږي.
باید یاده شي، چې تر دې وړاندې روسیې هم ویلي و، چې دوی به د افغانستان او تاجکستان په ګډې پوله کې د ترهګرو ډلو د ځپلو په موخه نظامي اډه جوړه کړي.