ننګرهار او لغمان کې د طالبانو د جګړې له؛ کبله ۳۵ زره وګړي بېځایه شوي

لغمان او ننګرهار ولایتونو کې د طالبانو د وروستیو جګړو او بریدونو له امله ۳۵ زره وګړي بېځایه شوي، چې اړینو مرستو ته اړتیا لري.
د ملګرو ملتونو د بشري مرستو دفتر وايي، چې په تېرو اونیو کې د طالبانو له لوري د جګړې د شدت او د ملکي وګړو په نښه کولو له کبله، په لغمان کې ۲۳ زره او په ننګرهار کې ۱۲ زره تنه بېځایه شوي دي.
دوی وايي، چې لغمان کې د طالبانو د جګړې له؛ کبله بېځایه شوې کورنۍ د علشینک او الینګار ولسوالیو اوسېدونکي وو، چې اوسمهال د لغمان مرکز مهترلام ته راکډه شوي دي.
د دوی د معلوماتو له مخې، په ننګرهار کې ډیری کورنۍ له اچین، پچیراګام، ده بالا او سرخرود ولسوالیو څخه دي، چې د ننګرهار ښار ته راکوچېدلې دي.
دوی زیاتوي، چې په یادو بېځایه شویو کورنیو کې ۲۴زره نفره یې اړینو مرستو ته اړتیا لري.
د ملګرو ملتونو د بشري مرستو دفتر د طالبانو له لوري د تاوتریخوالي کچې لوړېدلو له امله اندېښمن دي او له طالبانو غواړي، چې د ملکي خلکو ژوند دې په خطر کې نه اچوي.
دوی وايي، چې په نورستان کې د طالبانو له لوري د عامه روغتون تړل کېدل غیر انساني عمل دی او ویلي یې دي، چې باید ملکي وګړو ته د خدماتو رسولو مرکزونه د جګړې برخه و نه ګرځي.
باید یاده شي، چې طالبانو تېره ورځ په هلمند کې د نجونو ښوونځی او په میدان وردګو کې د عبدالوکیل خان انیسټیټوټ سوځولی.