د طالبانو جګړې ۱۵ ورځو کې ۶ زره کورنۍ مېنو پرېښودو ته اړ کړې

د طالبانو د جګړو له امله یوازې تېره میاشت د هېواد په بېلابېلو ولایتونو کې ۶۰۰۰ کورنۍ بېځایه شوې دي.
د کډوالو او راستنېدونکو چارو وزارت وايي، چې د روان لمریز کال د پیل راهیسې تر اوسه د هېواد په بېلابېلو ولایتونو کې تر  ۲۲ زره ډېرې کورنۍ بېځایه شوې دي.
د دوی د ارقامو له مخې، شاوخوا ۲۲۴۱۶ کورنۍ په ولایتونو کې امن ځایونو ته انتقال شوې دي.
دوی وايي، چې د طالبانو د جګړې له امله یوازې د غبرګولي میاشتې د ۱۵ مې نېټې تر پایه ۶۰۰۰ کورنۍ بېځایه شوې، چې لومړنیو توکو ته جدي اړتیا لري.
دغه راز د یاد وزارت د معلوماتو له مخې، یادو بېځایه شویو کورنیو شمېر تر ۱۶۰ زره زیات دی.
یاد وزارت اندېښنه ښودلې، چې که چېرته د طالبانو د تاوتریخوالي کچه ټیټه نه شي؛ نو د کډوالو شمېر به تر دې هم زیات شي.
باید یاده شي، چې د افغانستان لپاره د ملګرو ملتونو مرستندویه ټولنې «یوناما» هم تېره ورځ ویلي و، چې دوی اندښنه لري، چې د امریکايي سرتېرو تر وتلو وروسته به طالبان د تاوتریخوالي کچه تر دې هم لوړه کړي او د ملکي وګړو ژوند به نور هم تریخ کړي.
دوی ویلي، چې د افغانستان اوسني وضعیت ته په کتو یې دا پرېکړه کړې، چې د بېځایه شویو کورنیو سره د مرستې په موخه به خپله مرستندویه ټولنه په افغانستان کې پرېږدي.
 دوی زیاته کړې، چې طالبان د جګړې پر مهال بشري حقونو ته پام نه کوي ؛ نو اړتیا ده، چې باید خپله مرستندویه ټولنه په افغانستان کې فعاله وساتي؛ ترڅو وکولای شي په ناوړه حالتونو کې خلکو ته اړینې مرستې ورسوي.