د دعوت رسنیز مرکز نوی چاپ شوي کتابونه

په دې ورځو کې د دعوت د چاپي او بریښنایي مېډیا مشر محمد طارق بزګر په هلو ځلو درې ټوکه کتابونه لوستونکو ته وړاندې شول.

لومړی د یو نارویژي لیکوال د کوچنیانو کتاب (کله چې طوطي والوت) ژباړنه ده چې ښاغلی بزګر دا کتاب په خوږه او ساده پښتو ژباړلی دی. دا کتاب په ناروې کې ډیر شهرت لري په بېلابېلو ژبو ژباړل شوی او په ملیونونو ټوکو خرڅ شوی دی.

دوهم د ننګرهار او کونړ خلکو اتل جاپاني ناکامورا (کاکا مُراد) په یاد او ستاینه کې د هغو لیکوالانو د لیکنو مجموعه د کتاب په بڼه چاپ کړ چې د کاکا مُراد روح ښاد شي او یادونه یې د تاریخ په زرینو پاڼو کي ثبت پاتې شي.

د افغانانو بهرنی اتل کاکا مُراد په هکله زموږ پخو لیکوالانو پخې لیکني په دې کتاب کې راټولې شوي دي. دا کتاب نه یواځې دا چې په ډیرو لوستلو ارزي بلکه زموږ هېوادوالو له پاره یو د لارې مشال کېدلی شي چې ډیر افغانان داسې په خپلو کلو، بانډو او ښارونو کې خیریه کارونه کولی شي.

دریم (ملي رسالت) چې د (محمد طارق بزګر کارنامې) کتاب دی چې مرحوم مصطفی عمرزي (ياد یې په خیر) په زیار، زحمت او  محنت د بیلابیلو لیکوالو د لیکنو راټولونه، تنظیم او بیا کتنې مجموعه او همدارنګه د بزګر د ویاړونو او جایزو یادونه ده.

محمد طارق بزګر په نوې ځوانۍ کې اروپا ته کډوال شو، د خپلو تعلیم او خپلو بچو ته د روزۍ پیدا کولو په خوا کې ډیره پخه، درنده او اړینه سیاسي او فرهنګي مبارزه پیل کړه.

زه د خپلې پخې ځوانۍ عمر کې او دعوت په خاپوړو کې وو چې دعوت سره زما اړیکې ټینګې شوی، دعوت زلمی شو او زه بوډا شوم چې سږکال دعوت خپله ۳۳مه کلیزه په شاندارو پخو او په زړه پورو لیکنو لمناځي.

زه د کتاب مینه وال پورتنیو دریواړو کتابونو لوستلو ته رابولم  او محترم طارق بزګر ته د درېواړو کتابونو د چاپ مبارکي وایم همدارنګه بزګر ته په سیاسي او فرهنګي مبارزه کې د لابریا دُعا کوم، قلم یې تاند او په ژوند یې برکت.

امین