څارګرې ادارې ادعا کوي، د طالبانو مشر څو کاله مخکې مړ شوی، طالبان یې تشې اوازې بولي

فرانس پریس خبري اژانس د کندهار ولایت سپیروان کلي کې د هغه کور ویډیو هم اخستې چې ویل کېږي د طالبانو د اوسني مشر مولو هبت الله اخوندزاده اصلي کور دی.

په دې ویډیو کې ښکاري چې دا یو خټین کور چې د ټوټي توره پرده یې پر اوسپنیز کانټینري دروازې ځړیږي.

د هغه د مرګ په تړاو تر دې مخکې هم ادعاوې شوې، خو پر افغانستان له تېرو څو میاشتو له واکمنۍ سره سره طالبانو تر اوسه داسې کوم کره لاسوند نه دی وړاندی کړی، چې وښيي چې مشر ژوندی دی.

د افغانستان مخکيني حکومت یوه امنیتي چارواکي فرانس پریس ته ویلي اخوندزاده څو کاله وړاندې مړ شوی او د کابل په نیولو کې هغه رول نه درلود.

دی وايي درې کاله وړاندې دی د کوټې ښار په یوه مدرسه کې ځانمرګي برید کې وژل شوی دی.

دا اژانس لیکی چې ”څو بهرنۍ استخباراتي ادارې ځینې وخت په لږ تو پیر سره دا نظر تاییدوي. ”

د سیمې د یوې امنیتي سرچینې په حواله ویل شوي چې ”هیڅوک د اخوندزاده د مرګ تایید نه شي کولی خو هیڅوک ترې انکار هم نه شي کولی. ”

د امریکا دفاع وزارت او مرکزي استخباراتي ادارې سي آی اې دې د دې رپوټونو په اړه له څه ویلو ډډه کړې ده.

که څه هم طالب چارواکو په کلکه دا اوازې رد کړي او ویلی یې دي چې هغه کندهار کې دی، ژوندی دی او له چارواکو سره لیده – کاته کوي، خو له ډېرو خلکو سره دا پوښتنه شته چې د طالبانو مشر ولې لږ تر لږه په یوه ویډیويي پيغام کې نه را ښکاره کېږي.

مولوي هبت الله اخوندزاده په ۲۰۱۶ کال کې د طالبانو مخکيني مشر مولوي اختر محمد منصور له وژل کېدو وروسته د طالبانو مشر شو.