جنرال دولت وزیري ته لیک

په یو افغان ټلویزیون کې مې ولیدل چې حنرال دولت وزیری صیب خپل هېواد ته شتون شو.

زه وزیري صیب ته هرکلی وایم چې خپل هېواد ته لاړ. هېواد ته تګ یې په نیک فال نیسم. الله (ج) دې داسې ورځ راولي چې ټول کډوال، مهاجر او مسافر افغانان زما غوندې دګلی، رټلی، کړېدلي، شړلی او زورېدلی افغانان خپل ګران هېواد ګل هېواد ته ستانه شي، خپل هېواد کې هستوګن شي، ارامه ساه واخلي، او ارامه ژوند وکړي.

زه وزیری صیب نه پیژنم او نه مې ورسره له نژدې څخه لیدلي دي. بس په قلم یې مین یم. زه د وزیری څخه هیله لرم کور ته راستنېدو سره خپل قلم بیا په لاس کې واخلي.

د دعوت درندې ویبپاڼې کې به مې د وزیري صیب لیکنه ولیدله لومړی به مې د دې لیکنه لوستله.

رښتیا چې ټولې لیکنې یې په زړه پورې دي بیا چې د خپل هېواد فوځ په باره کې یې څه لیکلی دي.

زه د وزیري صیب څخه هیله لرم چې څه لیکي نو فوځي او نظامي برخه کې دې ولیکي ځکه چې موږ ادبي، سیاسي، اقتصادي، فرهنګي په کل کې ټولنیز او سیاسي خورا ډیر لیکوالان لرو خدای دې لاپسې ډیر کړي قلم یې تاند غواړم. ولې په فوځي او نظامي  برخه کې زموږ لیکوالان په اوړو کې د مالګې مثال لري.

زه جنرال صیب ته یو ځل بیا هرکلی وایم او هیله مې همدا ده پښتو ژبې ته فوځي څیړنیز کتابونه ولیکي او وژباړي.

د لوی خدای (ج) په دربار کې زه د جنرال وزیري صیب فوځي او نظامي قلم تیز او ژوند یې اوږد غواړم.

شتوتګارت، جرمني