په افغانستان کې د خوارځواکۍ ناورين

د دغه وزارت له پاره د طالبانو ویاند ډاکټر شرافت زمان امر وايي: «په اسد میاشت کې نږدې دوه لکه شیدې ورکوونکې میندې په منځنۍ او شدیدې خوارځواکۍ اخته شوي او دغه راز، په شدیدې او متوسطې خوارځواکۍ اخته میندې او ماشومانو درملنه شوې ده.»

نوموړي وویل، اوس په ټول افغانستان کې پر نورو روغتیايي مرکزونو سربېره پنځه سوه ګرځنډه ډلې جوړې شوي، چې په خوارځواکۍ د اخته کسانو درملنه کوي. ډاکټران وايي، خوارځواکي د بد اقتصادي حالت په جریان کې د سالم او ښو خوړو نه درلودلو له امله پیدا کېږي.

د ننګرهار ولایت په مرکزي روغتون کې د داخله ناروغیو متخصص ډاکټر عبدالوکیل عماد دویچه ویله ته وویل، که په ورځني ژوند کې سالم او انرژي لرونکي خواړه ونه خوړل شي له امله یې میندې او ماشومان په خوارځواکۍ اخته کېږي. نوموړي وویل، په دې وروستیو کې جلال اباد حوزوي روغتون ته ګڼ شمېر ماشومان او میندې وروړل کېږي، چې په خوارځواکۍ اخته شوي دي.

ډاکټر وکیل عماد وویل: «بېلابېل علتونه لري. ډېر یې ناوړه اقتصادي حالت دی، چې په دې کې ماشومان ډېر اخته کېږي. په لویانو کې هم خوارځواکي پیداکېږي. د مخنیوي لاره یې سالمه غذا او منظمه تداوي ده.»

نوموړي وویل، که چېرې په خوارځواکۍ د اخته کسانو پر وخت تشخیص او درملنه ونه شي، په اسانۍ سره په نورو ناروغیو اخته کېدای شي. د ننګرهار یو اوسېدونکي محمد جان، چې په خوارځواکۍ اخته کوچنی زوی یې جلال اباد حوزوي روغتون ته وړی دویچه ویله ته وویل: «موږ دومره وس نه لرو، چې ښه ډوډۍ پیدا کړو، ایله دومره کوو، چې شپې ورځې پرې سبا کوو او ډاکټران وايي، چې اولاد ته صحیح ډوډۍ ورکوئ.»

له هغه وخته چې طالبان واک ته رسېدلي په افغانستان کې د خلکو اقتصادي حالت خراب شوی، د بې روزګارۍ او فقر کچه لوړه شوې او خلک په ورځني ژوند کې له سختو ستونزو سره مخ دي.

ملګرو ملتونو ویلي دي چې دا مهال ۱۹ میلیونه افغانان له لوږې او بې وزلۍ سره مخ دي، چې له دې جملې شپږ اعشاریه شپږ میلیونه خلک بېړنیو خوراکي توکیو ته اړتیا لري. د بشري مرستو په چارو کې د ملګرو ملتونو د سرمنشي مرستیال مارټین ګریفټس ویلي، د بشري مرستو سربېره اړتیا ده چې د افغانستان بانکي سیستم پیاوړی شي.