مازیګر ـ ټپې

‏په مازیګر دې کډې لاړې
په مازیګر د مرورو کډې ځينه

د مازیګر زیړی لمره
ته لا ولا‌ړ یې په ما پرېوتل ګردونه

‏یو مازیګر نه دی چې تېر شي
هر مازیګر دې نوی نوی غم راځینه

هېڅوک دې بد راسره نه کړي
عمر د ژمي مازیګر دی تیر به شینه

مازيګرئ ده ښېرې مه کړه
ته به د ناز ښېرې کوې رښتيا به شينه

مازيګر تېر شو ماښام راغلو
نه جانان راغلو نه مې وکړل ديدنونه

مازیګر چېرته وې چې نه وې
خورې ورې زلفې په بام واړه ومه

د مازیګر زېړیه لمره
په نا خبره یار مې وایه سلامونه

مازیګر لمونځ دې قبول مه شه
دیدن دې پرېښود د ایمان کوې سوالونه

مازيګر لمونځ رانه قضا شو
نوى مين وم په ديدن نه مړيدمه

چې به په کوم حال وې لالیه
ماته زیړی مازیګر تا رایادوینه

څنګه چې نن مازیګر تېر شو
داسې به تېره شي دا ستا لېونۍ مینه

د مازیګر زیړیه لمره
په چا ولاړ یې په چا ولویدې په غرونه

د مازیګر زیړیه لمره
ته به ولاړ وې زه به تورې خاورې ومه

د مازيګر زيړيه لمره
زر پناہ کېږه چی د یار دیدن ته ځمه

زېړه په زېړ مازیګر راغله
زېړې په زېړه زنه درې ايښي خالونه

هر مازیګر چې سترګه لویږي
د تنارۀ پاستی وېشه کۀ خاورې ومه

مازیګر ښه وي دیدن وشي
ورکه غرمه شه لیلا کور کوي خوبونه

مازیګر تیر شو سترګه لاړه
زړګیه ژاړه ودې نکړل دیدنونه

یار خو مې شته بې یاره نۀ یم
د مازیګر په لوبو ورک دی رابه شینه