خپلې خولې خپلې اوبه

آمو سيند به مهارېږي، زما ګران افغانستان کې
وچې خاورې به لندېږي، زما ګران افغانستان کې

تاريخ وايي سپېرې شګې او اوبه مې ملکيت دی
د آمو درياب بهېږي، زما ګران افغانستان کې

په کلونو، په نسلونو، نظامونه راغله تېر شول
يو په يو پسې تېرېږي، زما ګران افغانستان کې

په دې عصر د پېشرفت او دې عصري تکنالوژي کې
نظامونه دي بدلېږي، زما ګران افغانستان کې

“قوشتيپې” دا شاړې ځمکې د آمو په زنخدان کې
پېغلې ځمکې به جوړېږي، زما ګران افغانستان کې

“د تندي خپلې خولې به اوبه خپلې” نوی سيند شي
تږی ډاګ به خړوبېږي، زما ګران افغانستان کې

پاکو وينو پاکو اوښکو رنګ راوړی دې زمان کې
اتفاق لمر به ځلېږي، زما ګران افغانستان کې

افغانان که ټول يو ځای شۍ امنيت او اتفاق کې
کاروانونه به رسېږي، زما ګران افعانستان کې

د کونړ او هرېرود، هلمند سيندونه به مهار شي
کانالونه به بهېږي، زما ګران افغانستان کې

علم پوهه تقاضا ده د افغان نجونو زلميانو
قوشتيپې په شان به کېږي، زما ګران افغانستان کې

“د جګ غر په سر هم لار شته” چې سالمه رهبري وي
مشکلات به ټول ختمېږي، زما ګران افغانستان کې

قوشتيپې عظيم کانال دې مبارک وي هر افغان ته
کنډوالې به ابادېږي، زما ګران افغانستان کې

چې اوبه په ځای د وينو او قلم د ټوپک ځای کې
د الفت سيند به بهېږي، زما ګران افغانستان کې

زه متين شکر ګزار يم پاک الله ته په دعا کې
زخمي ژوند به ټکورېږي، زما ګران افعانستان کې

————- سپټمبر – ۲۹ – ۲۰۲۳

سنترال ويلې – منټيکا – کليفورنيا