سل کلونه، زرکلونه، ډېر د وړاندي
راټول سوی وه مېږیان تر چتر لاندي
لس کلونه، سل کلونه، ډېر عمرونه
د مېږیانو وې جرګې او مجلسونه
چي موږ ډېر یو تر شمېره تر حسابونو
ولي هره ورځ اخته یو په غمونو
مېږي خور که شرمښکۍ ده که مرغان دي
زموږ پر مځکه په هوا کي دښمنان دي
چي په کلي کي غوايي سره په جنګ سي
زموږ کورونه زموږ ښارونه پکښي ړنګ سي
انسانانو یو متل دی پیدا کړی
له کوم ځای له کوم کتابه یې راوړی
چي مېږي ته خدای په قار سي وزر ورکړي
سمدستي یې د مرګي مخي ته سپر کړي
دا موږ ولي همېشه غم ته پیدا یو
له سهاره تر ماښامه په ژړا یو
دا نور وزېږي، زلمي سي، بیا زاړه سي
چي په ژوند یې ارمان وخېژي نو مړه سي
زموږ مېږیانو هم زلمي هم ماشومان مري
کله لس کله مو سل په یوه آن مري
هر مشکل ته پیدا کېږي یوه لاره
موږ پخپله یو له حل څخه بېزاره
چي موږ ټوله په یوه ژبه ګړېږو
په خبره ولي نه سره پوهېږو
څو مېږیانو پکښي وکړل تقریرونه
شاعرانو پکښي ولوستل شعرونه
تور مېږي وه، سره مېږي وه، ښانګور وه
په یوه جرګه کي ناست وه مروروه
یوه ژبه یې ویل د یوه اېل وه
ټول مېږي وه خو هر ګوره سره بېل وه
په هفتو یې سره وکړل مجلسونه
هم ښکنځلي پکښي وسوې هم جنګونه
مندوشاه چي هم هوښیار هم پهلوان وو
له نیکونو په مېږیانو کي سلطان وو
ډبرینه یې قلا لیري له ښاره
ګوښه پروت وو د مېږیانو له آزاره
نه یې غوږ وو پر ښکنځلو پر جنګونو
نه په غم کي د مېږیانو د غمونو
ښه خبر وو مندوشاه له مصیبته
اردلیانو خبراوه له هر آفته
د جرګو ورته راتلله رپوټونه
مندوشاه به کاڼه واچول غوږونه
خپل استازی یې ورواستاوه خزدکه
چي په لاره کي څو ځلي سوله ورکه
نه په ژبه پوهېدله د مېږیانو
نه مشکل ورته معلوم سو د خوارانو
دومره پوه سوه چي مېږیان سره جنګېږي
پر وړو لویو خبرو نه جوړېږي
نه مېږیانو زده کړه ژبه د خزدکي
له وړو او له لویانو لاري ورکي
هره ورځ لا جرګې کېږي د مېږیانو
جنازې دي چي ډېرېږي د خوارانو
له سدیو دا یوه خبره کېږي
د مېږیانو کور له غمه نه خلاصېږي.
د ۲۰۱۸ کال د مې اته لسمه ویرجینیا
جهاني
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
