د کرونا ویروس اغیزې اوږد مهاله دي؟

لا په دې اړه کره خبره نشي کېدلی، ځکه دا وېروس نوی دی او ځکه یې اړوند ارقام هم تازه دي.

خو ځینو نورو ناروغیو کې چې کله د نا روغ د بدن دفاعي نظام جدي غبرګون ښودلی نو ځینې اوږدمهال تنفسي ستونزې ورته پیدا شوې دي.

دا ستونزې ان له ناروغۍ پنځه کاله وروسته هم پاتې شوي، او اغېزمن کس ته یې فزیکي او رواني ستونزې پیدا شوې دي.

ډاکټران له کرونا وېروس د بشپړ رغېدنې لپاره پر رواني درملنه هم ټینګار کوي.

که چې یو ناروغ د جدي پاملرنې څانګې ته وړل کېږي نو هېڅوک اټکل نشي کولی چې روغ به راووځي که نه.

له بېول کېدو مخکې ډاکټر له ناروغ پوښتنه کوي چې ایا خپلې کورنۍ سره خدای پاماني کول غواړي. دا وضعیت پخپله وېروونکی دی او ډېرو کسانو لپاره رواني تکلیف پیدا کوي.

په دې اړه هم کره شمېر ښودل ګرانه خبره ده. خو د جان هاپکنز پوهنتون وایي، تر دې دمه د څه کم ۳ میلیونه ناروغانو له ډلې یې څه باندې ۸سوه زره  کسان بېرته ښه شوي دي.

خو هر هېواد د شمېرو ثبتولو جلا طریقه لري، او ځینې خو رغېدلي کسان هېڅ شمېرې هم نه او له همدې کبله د عادي علایمو لرونکي ناروغان اصلاً په لېست کې نه راځي.

د کرونا وېروس پر ضد د بدن د دفاعي نظام یا د رغېدنې د دوام په اړه ډېرې خبرې کېږي، خو کره شواهد تر اوسه لږ دي.

هغه کسان چې له دې وېروسه ښه کېږي، تمه کېږي چې بدن به یې پر ضد خپل دفاعي غبرګون پیاوړی کړی وي.

دویم ځل په دې وېروس اخته کېدل ډېر لاملونه درلودلی شي، د بېلګې په توګه کېدای شي د لومړۍ معاینې پایله مو ناسمه وه او هغه وخت تاسې وېروس اصلاً نه درلود، خو اوس پرې اخته شوي یاست.

نو د دې وېروس پر ضد د بدن د دفاعي نظام غبرګون، او د دوامداره خوندیتوب موضوع مهمه ده.

دې برخه کې څېړنې به جوته کړي چې ایا یو کس دویم ځل هم په کرونا وېروس اخته کېدلی شي، او واکسین څومره اغېزمن ثابتېدلی شي.