بولټن د افغانستان په اړه د ټرمپ او خلیلزاد سیاستونه رسوا کړل

د امریکا د ملي امنیت مخکیني سلاکار جان بولټن په خپل تازه چاپ شوي کتاب کې لیکلي، چې د افغان سولې لپاره د امریکا د بهرنیو چارو وزارت د ځانګړي استازي په توګه د زلمي خلیلزاد له ټاکلو سره جمهور رییس ډونالډ ټرمپ همغږی نه و او نیوکې يې پرې کولې.

بولټن په خپل کتاب کې زیاته کړې، مخکې له دې چې خلیلزاد افغان سولې لپاره استازی وټاکل شي، واشنګټن ته یې ویلي وو چې طالبان غواړي ټرمپ سره سوله وکړي

هغه لیکلي” خلیلزاد مې دفتر ته راغی، راته يې وویل ځينې کسان ادعا کوي چې زه د طالبانو په استازیتوب خبرې کوم، ما دغه مسله له نورو امریکايي چارواکیو سره هم شریکه کړې ده، خو وروسته زه پرې پوه شوم چې خلیلزاد واقعآ هم د طالبانو په مخفي چینل بدل شوی دی.”

د کتاب په یوه بله برخه کې همدا راز بولټن د ټرمپ په هغه سیاست هم نیوکه کړې چې له مخې يې ټول امریکايي سرتېري له افغانستانه باسي.

هغه لیکلي، که څه هم ټرمپ ټولو ګواښونو ته متوجه دی او درک کوي یې، خو بیا هم له افغانستانه د امریکايي ځواکونو په وتلو ټینګار کوي، هغه څو وارې له ما، پامپیو او د وخت دفاع وزیر جیمز متیس سره کتنه کې زمونږ خبرې کټ او زیاته به یې کړه چې ټول سرتېري باسم.

د بولټڼ په دې کتاب کې راغلي، ټرمپ سره مې څو وارې جلسه کې وویل چې افغانستان کې زمونږ حضور مهم دی، دې جلسه کې د وخت دفاع وزیر متیس هم راسره و، هغه وویل د داعش ګواښ پر ځای دی، خو ټرمپ په غوصه حالت کې وویل چې پرېږدئ روسیه دا دنده پر مخ یوسي.

کتاب کې همدا راز ویل شوي، په هر قیمت چې کېږي ټرمپ له افغانستانه خپل سرتېري باسي.