د سولې مذاکرات او د طالبانو دريځ

له تیرو څو کلونو او په ځانګړي ډول تیر یو کال راهیسې افغان حکومت د سولې لپاره خپله اراده او حسن نیت ښودلی چې د افغانانو تر څنګ د نړۍ هېوادونه پرې هم خبر دي او هرکلی یې کړی دی.

خو برعکس طالبانو د سولې پروسه کې هیڅ داسې ګام نه دی اخیستی چې مثال یې ورکړي او خلک باور وکړي چې طالبان نور جګړه نه غواړي او سوله کوي.

همدا د طالبانو مبهم دریځ او نیت خلک او په ځانګړي ډول افغان ملت له سخت تشویش سره مخ کړی او تر نن نه پوهیږي چې طالبانو سوله کوي او که نه، که سوله کوي، په کومو شرطونو یې کوي.

طالبانو د سولې لپاره دوه مهم شرطونه درلودل چې دواړه یې ومنل شول، یو د بهرنیو ځواکونو د پوځي حضور پای وه او بل یې د زندانیانو خوشې کیدل و، دا دواړه پوره شول او یا پوره کیدونکي دي.

د طالبانو د شرطونو منل د دې لپاره نه و چې ګنې طالبان زورور دي، ولایتونه او کابل به سقوط کړي، دا شرطونه د دې لپاره ومنل شول چې دا ډله نوره د خلکو بې ځایه وینه توی نه کړي.

لویه مشورتي جرګه کې چې د جرګې غړو د طالب زندانیانو خوشې کیدو ته مثبت رای ورکړه، دا غوښتنه یې هم درلودله چې باید طالبان د سولې لپاره ښه نیت وښيي چې خلک باوري شي.

د زندانیانو خوشې کیدل بې شرطه نه و، ځکه د جرګې اکثره غړي بې باوره و چې طالبان به زندانیان ترلاسه کړي، خو جګړې ته به دوام ورکړي.

په دې تړاو نړیوالو تضمینونو غوښتنه شوې او له طالبانو غوښتل شوي چې د زندانیانو له خوشې کیدو سره سم دې خبرې پيل کړي او نور دې د جګړې دوام ته پلمې نه لټوي.

له دې ټولو سره سره طالبانو جګړې ته دوام ورکړی او هره ورځ اوس هم ملکي وګړي د جګړې قرباني کوي.

افغان ولس اوس هم په تمه دی چې د طالبانو دريځ د سولې خبرو د پيل او بحثونو په تړاو څه دي.

عمده پوښتنې له خلکو سره دا دي چې ایا طالبان اوس هم د امارت په فکر کې دي، طالبان اوس هم د افغان امنیتي او دفاعي ځواکونو د منحل کیدو په فکر کې دي، طالبان اوس هم د بیرغ بدلیدو په فکر کې دي، طالبان اوس هم د ځینو ارزښتونو له منځه تللو په فکر کې دي، کنه طالبان دا هر څه مني.

ځکه خلک غواړي پوه شي چې طالبان غواړي څنګه سوله وکړي، په کوم قیمت وکړي، کوم ارزښتونه مني او کومې لاسته راوړنې او ارزښتونه نه مني.

یو څه چې روښانه دي، هغه دا چې طالبانو ته لوی مشورتي جرګې هر څه روښانه کړي او حکومت ته یې لار ښودلې چې له طالبانو سره څنګه سوله وشي.

خو لږ ترلږه د طالبانو دوه سترې غوښتنې منل شوي، طالبان خو دې د سولې پروسې په تړاو خپل دریځ ډاګیز کړي.