له امریکا سره هوکړه کې د طالبانو درې عمده سرغړونې

امریکا متحده ایالتونو له وسله والو طالبانو سره څو میاشتې مخکې د سولې هوکړه لاسلیک کړه چې پکې طالبانو ځینو مواردو باندې مکلف شوي و چې باید لاس ترې واخلي.

خو طالبانو ځینې عمده موارد چې امریکا یې په کلکه غوښتنه لري، سرغړونې کړي او دا د سپينې ماڼۍ له سخت غبرګون سره مخ شوي دي.

له بهرنیو ترهګرو سره د اړیکو پریکول

دا هغه شرط و چې امریکا طالبانو ته ايښی و او په همدې اساس یې د سولې تړون شوی و، خو طالبانو تر نن د دې وضاحت ور نه کړ چې له القاعده او نورو ترهګرو ډلو سره اړیکې پرې کوي، کنه.

راپورونه وایي، طالبان لا هم ځینو سیمو او په ځانګړي ډول هلمند کې د القاعده مخکښ غړي له ځان سره لري او د هغوی په امکانات باندې جګړه کوي.

طالبان د اسلام له غمه دومره مړه نه دي، بلکې القاعده ډله طالبانو ته پيسې ورکوي چې ددې ډلې غړي به افغانستان کې ساتي چې هیڅ ډول خطر ورته نه وي.

طالبانو تر نن د القاعده غړي له ځان سره ساتلي او د خوندی ځایونو او فعالیت زمینه یې ورته برابره کړې، که داسې نه وي، لږ ترلږه طالبان دې یوه اعلامیه کې ووایي چې دوی نور له القاعده سره همکاري نه کوي او خپلو تر فعالیت لاندې سیمو کې اجازه نه ورکوي چې پټ شي.

له ایران د وسلو او امکاناتو ترلاسه کول

له طالبانو سره د امریکا د هوکړې بل شرط دا و چې له بهرني هېوادونو به د جګړې لپاره امکانات نه ترلاسه کوي او د افغانستان خاوره به د نورو هېوادونو او په ځانګړي ډول د امریکا پرضد نه کاروي.

خو راپورونه ښکاره کوي چې طالبانو تازه په هلمند کې د ایران له سپاه پاسداران ډلې څخه پيسې او امکانات ترلاسه کړي چې د امریکا پر ګټو باندې بریدونه وکړي.

لکه دوه ورځې وړاندې چې د ایران حکومت وویل چې د قاسم سلیماني غچ اخلي، دا غچ په امریکا او ایران کې نه اخلي، بلکې ایران وسله والو ډلو ته وسلې او امکانات ورکوي چې دا غچ په افغانستان او سوریه کې واخلي.

دا راپورونه دقیق دي چې د طالبانو د مشرانو ځینو کورنۍ له افغانستان سره نږدې د ایران پر پوله پراته دي چې فراه ، نیمروز او هلمند ولایتونو ته ترې تګ راتګ کوي.

طالبان به عامه ځایونه نه ورانوي

د امریکا او طالبانو ترمنځ هوکړه کې یو بل شرط دا و چې طالبان به عامه تاسیسات نه ویجاړوي، بلکې ساتنه به یې کوي.

خو تازه د کندهار د ارغستان ولسوالۍ سړک چې په اساسي ډول جوړ شوی و، طالبانو په تراکتورونو اړولی او ماینونه یې پکې ځای په ځای کړي دي.

دغه راز طالبانو وسله والو قومندانانو له ایران امکانات ترلاسه کړي چې په مقابل کې به د کمال خان بند، د کجکي بند، د سلما بند لپاره ستونزې جوړوي او د موقع پر وخت به دا تاسیساتو ته زیان رسوي.

دا هغه عمده سرغړوني دي چې طالبانو له امریکا سره په هوکړه کې کړي او امریکا یې سخته اندیښمنه کړې ده.

طالبان هیڅ ارزښت، مذهب او وعدې ته ژمن نه دي او هر هغه کار باندې چې څوک پيسې ورکړي، همغه کار کوي او په دې برخه کې د هیچا، هیڅ هېواد او هیڅ مذهب پروا نه ساتي.