د بښنې نړیوال سازمان: طالبان پر خپلو کړنو انساني حقونه تر پښو لاندې کړي

د بښنې نړیوال سازمان له طالبانو غوښتي، چې د جګړې پر مهال دې بشري حقونو ته درناوی وکړي.
د یاد سازمان له خوا په خپره شوې خبرپاڼه کې راغلي، چې د طالبانو له لوري د ملکي وګړو وژنه او د عامه تاسیساتو ړنګېدل په ښکاره ډول د طالبانو د ذهنیت استازولي کوي.
دوی ویلي، چې طالبان باید له جګړې لاس واخلي او د سولې خبرې دې چټکې کړي.
په دې وروستیو کې طالبانو افغانستان کې د عامه تاسیساتو پر ورانېدو لاس پورې کړی، چې د جګړې او د بشري حقونو خلاف دی.
دوی اندېښنه ښودلې، چې که چېرته په افغانستان کې د طالبانو له لوري د ملکي وګړو وژنه او د عامه تاسیساتو د ورانېدو مخه و نه نیول شي؛ نو ناورین به رامنځته شي.
باید یاده شي، چې تېره ورځ د افغان حکومت د سولې مرکچي پلاوي په خپل منځي غونډه کې د یادې پروسې د خبرو په ټپه درېدل د اندېښنې وړ بللي دي.
بل لور ته بیا طالبانو هم د افغان سولې د مذاکراتو په پروسه کې د ګډون کولو څخه انکار کړی دی.
دغه راز یوازې تېرو دریو اونیو کې په بېلابېلو ولایتونو کې تر ۸ زره ډېرې کورنۍ د طالبانو د جګړې له امله بېځایه شوې دي.