پاکستاني چارواکي: د طالبانو مخالفت نه؛ بلکې ملاتړ کوو

 د پاکستان د پارلمان غړو تېره ورځ ویلي، چې د دوی نظامي چارواکو خبرداری ورکړی، چې پاکستان کې به د طالبانو پر وړاندې مخالفت ناوړه پایلې ولري.
یادو کسانو پاکستاني رسنیو ته د نوم نه ښودلو په شرط ویلي، چې یاد خبر داری د پاکستان لوی درستیز قمر جاوید باجوه او د پاکستان د استخباراتو«ای اېس ای» مشر فیض حمید  ورکړی دی.
پاکستان کې یاده امنیتي ناسته له افغانستان څخه د امریکايي سرتېرو پر وتلو او پر پاکستان یې د اغېز پر تړاو نیول شوې وه.
د یادې ناستې پر مهال پاکستاني چارواکو ویلي، چې که چېرته پاکستاني پوځیان د طالبانو پر وړاندې کوم اقدام وکړي؛ نو د یادې ډلې له لوري به له سخت ځواب سره مخ شي.
دوی همدا راز ویلي، چې پاکستان باید د طالبانو د مخالفت پر ځای ملاتړ وکړي؛ ترڅو خپلو اهدافو ته ورسیږي.
تر دې وړاندې د پاکستان صدر اعظم عمران خان هم ویلي و، چې د طالبانو پر وړاندې به هېڅ کوم اقدام نه کوي.
دغه راز په دې وروستیو کې د پاکستان په اړه داسې شواهد هم لاسته راغلي، چې له طالبانو  ملاتړ کوي، او د دوی د ټپیانو د درمنلې په موخه یې د ډېورنډ کرښې هاغاړه روغتونه هم جوړ کړي.
څو ورځې وړاندې داسې اسناد هم ترلاسه شول، چې یادو روغتونو ته قمر باجوه په خپله د طالب ټپیانو د پوښتنې لپاره ورغلی و.