پنټاګون: افغان ځواکونو سره به په مالي او لوژیستکي برخو کې همکاريو ته دوام ورکړو

د امريکا دفاع وزارت  وايي  که څه هم د دوی ماموریت په افغانستان کې پای ته رسیدلی؛ خو په مالي او لوژيستکي برخو کې به له افغان ځواکونو سره خپل ملاتړ ته دوام ورکړي. 
د پنټاګون ویاند جان کربي په خپلو تازه څرګندونو کې ویلي، دوی اوسمهال پر دې ډادمن دي، چې افغان ځواکونه کولای شي پر خپله خاوره ترهګرې ډلې وځپي.
د امريکا د دفاع وزارت وياند زياته کړې چې پینټاګون د افغان ځواکونو په روزنه او ظرفیت لوړولو کې ډېر وخت لګولی او اوس د دې وخت را رسېدلی، چې افغان سرتیري په خپله له افغانستان څخه دفاع وکړي.
کربي دا هم ویلي، چې له افغانستان څخه د دوی د سرتېرو وتل په دې معني نه دي، چې له افغان ځواکونو سره يې ملاتړ پای ته رسېږي.
نوموړي په واشینګټن کې خبريالانو ته خبرو کې زياته کړې ، که څه هم په افغانستان کې د دوی ځمکنی ماموریت پای ته رسیدلی؛ خو په مالي او لوژستکي برخو کې به افغان سرتېرو سره خپلو مرستو ته دوام ورکړي.
باید یاده شي، چې د امریکايي سرتېرو له وتلو سره سم طالبانو په هېواد کې د خپلو بریدونو کچه لوړه کړې؛ خو افغان ځواکونو په بریالیتوب سره د دوی بریدونه ځپلي دي.
افغان ځواکونو په دې وروستیو کې د خپلو چاڼیزو عملیاتو په ترڅ کې طالبانو ته سخته مرګ ژوبله اړولې او د یادې ډلې یو شمېر وسلې او مهمات یې هم له منځه وړي دي.