امرالله صالح: پاکستان په افغانستان کې مستقیمه جګړه پیل کړې

د ولسمشر لومړي مرستیال امرالله صالح پر خپله ټویټر پاڼه لیکلي، چې پاکستان د طالبانو ملاتړ او د افغانستان مستقیمې جګړې ته را دانګلي او په ‌ډېرو برخو کې له طالبانو سره ان د هوايي ځواک مرسته هم کوي.

نوموړي تېره شپه پر خپله ټویټر پاڼه لیکلي، چې د پاکستان حکومت  افغان هوايي ځواک ته اخطار ورکړی او ویلي یې دي، چې که په سپین بولدک کې پر طالبانو عملیات وکړي؛ نو دوی به یې پر وړاندې جدي اقدام وکړي.

که څه هم هغه وخت پاکستان د امرالله صالح خبرو ته کوم غبرګون ونه ښود؛ خو نن ورځ د یاد هېواد د بهرنیو چارو وزیر د صالح خبرې بې بنسټه بللې وې، چې امرالله صالح یې په ځواب کې د ثبتونو خبره کړې او لیکلي یې دي، چې پاکستان له تېرو ۲۰ کالو راهیسې افغانستان کې د طالبانو هر ډول مالي او نظامي ملاتړ کوي او دا هېواد نور د افغانستان له جګړې انکار نشي کولای.

نوموړي لیکلي، چې پاکستان له تېرو ۲۰ کالو راهیسې د کویټې شورا ملاتړ ته دوام ورکړی او په خپل کور کې یې طالبانو ته ځانګړي پټنځایونه او روزنیز مرکزونه جوړ کړي دي.

باید یاده شي، چې د ولسمشر لومړي مرستیال دوه ورځې وړاندې هم ویلي و، چې پاکستان د افغانستان د پوځ له منځه تلل غواړي او خطرناکه لوبه یې پیل کړې، چې پایلې به یې دوی ته په ګټه نه وي.