پیتریوس: پاکستان د طالبانو لپاره امن کور دی

پاکستان له اوږدې مودې راهیسې طالبانو ته په خپل کور کې پټنځایونه، روزنیز مرکزونه او هر ډول اسانتیاوې برابرې کړې دي؛ نو ځکه یاد هېواد د طالبانو لپاره د امن د کور په څېر ارزښت لري.
امریکايي جنرال او د سي ای اې پخوانی مشر پیتریوس په خپلو وروستیو څرګندونو کې ویلي، چې افغانستان کې ترهغې امن نه راځي، ترڅو پاکستان کې د طالبانو پټنځایونه له منځه لاړ نه شي او یاد هېواد په کوېټه او بلوچستان کې د طالبانو پر وړاندې اقدام ونه کړي.
د پټریوس په خبره، د افغان سولې پروسې د ځنډ یو لامل هم د پاکستان حکومت له لوري طالبانو ته د هر ډول امکاناتو برابرول دي او که چېرته دا چاره همداسې دوام وکړي؛ نو طالبان به هیڅ وخت مذاکراتو ته زړه ښه نه کړي.
نوموړی یادې څرګندونې په داسې حال کې کوي، چې څه موده وړاندې د پاکستان د کورنیو چارو وزیر شیخ رشید هم له یو ټلویزون سره په مرکه کې ویلي و، چې طالبان زمونږ خپل خلک دي او هر ډول اسانتیاوې مو ورته برابرې کړې دي.
هغه دوه ورځې وړاندې له پاکستاني ټلویزون جیو نیوز سره هم په مرکه کې ویلي و، چې طالبان مو د دې لپاره رامنځته کړل؛ ترڅو پرې افغانستان له منځه یوسو.