محرقه او درملنه یې

 آیا د پښو تلي مو سوځيږي او ورسره دوامداره  سر دروندوالی او سر درد لرئ ؟

◀ د نس بادونه ، د نس دردونه او د دوامداره قبضیت او ورسره وخت ناوخته اسهال کیږئ ؟

◀ آیا بدن مو ګرمیږي او ورسره د هډوکو دردونه لرئ او د خیټې / نس او معدې شدید دردونه لرئ ؟

◀ د محرقې مکروب چې د Salmonella typhi په نامه هم یادیږي یو ‌‌‌‌‌‌ډول بکټریاوي ناروغي ده چې د ناپاکو اوبو او ناپاکو خوړو له لارې ځان د انسان هاضمي سیسټم ته رسوي . دغه مکروب په لمړیو کې ځان د کوچنیو کولمو په داخلي دیوال کې ځای پرځای کوي او له همدې ځایه د یوې هفتې تر یوې میاشت په ترڅ کې ځان لمفاوي غدو ته رسوي او بلآخره د وینې جریان ته ننوځي او د وینې له جریانه بیا د بدن بله هره سیمه او هر ارګان ګواښلی شي .

د دغې ناروغۍ نښې نښانې  : د بدن ګرمیدل یا نرۍ تبه ، د هډوکو دردونه ، د شپې لخوا د پښو تلې سوځیږی ، د سر دوامداره دردونه  ، د نس دردونه او د نس بادونه ، دوامداره قبضیت او ځینې وخت اسهالات ، د ‌‌‌‌‌‌ډکو متیازو تور رنګ ، د معدې دردونه او د خوړو بد هضمي ، کمزوري او د وزن کمیدل ، ساړه او پر بدن د لرزې راتګ .

 د محرقې زیانونه : کله چې د محرقې مکروب په کولمو کې وي نو دغه زیانونه حتماً منځ ته راوستلی شي لکه د کولمو زخم ، له کولمو د وینې بهیدل ، د کولمو سوري کیدل ، کم خوني ، د لمفاوي غدو التهاب ، د بدن دفاعي ځواک کمزوری کوي او همدغه کمزوري د دوامدارې نرۍ تبې سبب ګرځي . د ځیګر او تورې غټیدل او پړسیدل  . د هډوکو کمزوري ، د مغزو د پردو مکروبي کیدل یا مننجیت . د غوږ ، ستوني او پوزې مکروبي کیدل او د بدن د مایعاتو کمښت . دوامداره ټیټ فشار او د تریخې مکروبي کیدل .

تشخیص : د محرقې ناروغۍ د تشخیص لپاره لاندې معاینات اړین دي .

① Typhoid Antibodies ( IgM + IgG ) .

② Stool Culture For Typhoid .

③ Bone Marrow Culture For Typhoid .

④ Vidal Test .

درملنه : تر بشپړ تشخیص وروسته د نوموړي مکروب ضد درمل د لس — پنځلس ورځو لپاره باید وکارول شي.

 پرهیز : غوړ خواړه نه خوړل ، تراخه او تُرشه شیان نه خوړل  ، خامې اوبه او ناپاکه ترکای نه کارول .