!که د مُلا شوه

خان زمان کاکړ

شعرونه او لنډۍ

By admin Last updated Apr 30, 2022

که د ملا شوه دېوالونه به د اور جوړ کړي

له پېښوره به د تورې بلا کور جوړ کړي

فن او هنر به وي تړلی په زنځير د فتوا

له نشتر هاله به زندان د رنتهنبور جوړ کړي

که د مُلا شوه نو د مينې افسانې به نه وي

کومې آبادې او سوکاله خېلخانې به نه وي

جنګ به مسلک وي، جنګ به وي د کاروبار وسيله

تش به ټوپک وي، د بل هيڅ روزګار کيسې به نه وي

که د مُلا شوه نو پر ژبو به قدغن لګېږي

او پر سرونو به مو رېس د ميراتهن لګېږي

د عقل، پوهې او شعور مېنه به شاړه ښکاري

دا قحط سالي به مو په ټول ښکلي وطن لګېږي

که د مُلا شوه سړيتوب به له انسانه وځي

خوږې رشتې او ورورولۍ به مو له ميانه وځي

د دستارونو د سړيو به وقار قتلېږي

د سر سړي به رانه يو يو له کاروانه وځي

که د ملاُ شوه نو بودا به سنګسارېږي ضرور

په جنتي سوات کې به بل باميان جوړېږي ضرور

په هر بازار کې به مو پړي د پنجاب خرڅېږي

د جلاد لاس به د نجيب ګرېوان ته لوېږي ضرور

که د مُلا شوه نو سالو به د ملالې سوځي

پت او ابرو به مو د ټولې پښتونوالې سوځي

سهار به وي خو ترنم به د مرغيو نه وي

د ونو سر کې به د ښکلو زاڼو ځالې سوځي

که د مُلا شوه اباسين به د موجونو نه وي

دا د سيندونو پلار به نور په غورځنګونو نه وي

د وينو رود به وي او زړه به يې له ويره شين وي

بهاند به وي خو آخر پلار به د سيندونو نه وي

که د مُلا شوه تصور د ژوندانه به نه وي

چرته لوړ سري او ښاغلي پښتانه به نه وي

دا د جرګو، د مرکو، د فېصلو سپين ږيري

دومره وزين، دومره سنګين، دومره درانه به نه وي

که د مُلا شوه د ماشوم غېږ به کتاب نه لري

ګلې ګلې د جاهلانو به حساب نه لري

څوک به د خپل وجود په ژبه باندې نه پوهېږي

څوک به د خپل وجود پوښتنې ته ځواب نه لري

که د مُلا شوه بې حسي به مو پر ژوند خوره وي

زړه له زونکې مايوسي به مو پر ژوند خوره وي

مستي، سيالي او خودداري به مو په خيال کې نه وي

يوه بدرنګه بې وسي به مو پر ژوند خوره وي

که د مُلا شوه داسې وګڼه ميراته شوله

زموږ دنيا زموږ په ژوند راڅخه پاته شوله

د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه

د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :

Support Dawat Media Center

If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320

خان زمان کاکړ