څنګه د مخ د پوستکي غؤړ لۀ منځه وړلی شو

دا ستونزه تر ډېره جینټکي ده. چې د دې سربېره ځينې نور عوامل هم لري. کله چې يؤ تنکی ځوان/پېغله د بلوغ مرحلې ته داخلېږي، د دوی مخ غوړ پیدا کوي، چې یو شمېر يې د وخت پۀ تېرېدو سره ختمېږي، خو د ځينو نورو د مخ غوړ بیا همداسې پاتېږي. د دې سربېره، د سینګار کم اصل او غیرې صحي توکي هم د مخ غوړ پیدا کوي. د سمارټ فون زیات استعمال هم دا ډول ستونزې زېږوي. په ټوله کې د مخ د پوستکي غوړ یوه بیولوژیکي ستونزه ده، چې په وجود کې د یو شمېر هورمونونو د افرازیدو په پایله کې رامنځ ته کېږي. خو؛ پوښتنه دا ده، چې څنګه د مخ د پوستکي غوړ له منځه وړلی شو؟

دلته يې ځینې مهمې، اغېزمنې، اسانه، ارزانه او طبیعي لارې چارې درښایم:

۱ـ د مڼې جوس:

د مڼې جوس د مخ د پوستکي لپاره ډېر ګټور دی، په ځانګړې توګه چې مخ غوړ او ځوانې دانې ولري.

لږ پنبه د مڼې په جوس لانده کړئ، په مخ يې ومښئ او پرېږدئ، چې مخ يې جذب کړي، څه وخت وروسته يې په پاکو اوبو ووېنځئ، دا کار څو ورځې پرلاپسې وکړئ نو د مخ غوړ او ځوانې دانې به مو تر ډېره له منځه لاړې شي. البته که چېرته د مڼې په جوس کې لږه د اوړو سوډا هم ور اضافه کړئ، ګټه به يې څو چنده زیاته وي.

۲ـ کیله:

کیله نه یوازې دا چې پوستکي ته ګټه لري، بلکې ډېرې نورې روغتیايي ګټې هم لري. د مخ د غوړو د ليرې کولو لپاره کیله را واخلئ، ښه يې میده کړئ، بیا لږ شات هم ورسره ګډ کړئ، که په وس مو پوره وي، په یخچال کې یې یخ کړئ، بیا يې په مخ ووهئ، هم به تاسې ته راحت کوونکی احساس درکړي او هم به مو د مخ غوړ ورسره کم شي.

۳ـ د هګۍ سپین:

د هګۍ سپین د پروټین په درلودلو سره د مخ د پوستکي لپاره خورا ګټور دي، د هګۍ سپین د مخ مړې حجرې رغوي؛ ځوانې دانې ختموي؛ مخ ته ځلا ورکوي او د مخ پوستکی ژر زړېدو ته نه پرېږدي. که د هګیو د سپینو سره لږ لېمو او شات  ګډ کړئ، ګټې به يې څو چنده زیاتي شي.

۴ـ د نارنج د پوستکي پوډر:

د نارنج د پوستکي پوډر که څه هم ګران بیه به وي، خو د مخ د پوستکي د غوړو په له منځه وړلو کې بې ګټې نه دي،

د نارنجو د پوستکي پوډر مخ ته ځلا ورکوي او په ټوله کې د مخ پوستکی تازه او روغ ساتي، دا ترکیب زیات ویټامینونه لري.

۵ـ د ګلاب اوبه:

د ګلاب اوبه نه یوازې د مخ پوستکی، بلکې د ټول وجود پوستکی تازه، روغ او نرم ساتي. هڅه وکړئ، چې د لامبلو په وخت کې په ټولو اوبو کې د ګلاب اوبه یا ګلاب واچوئ او بیا په هغو اوبو ولامبئ، پوستکی به مو ښه او ښکلی وي.

۶ـ جواری او مستې:

د جوارو اوړه او مستې که سره ګډې شي، او د پنځو دقیقو لپاره پر مخ ووهل شي، د مخ غوړ کموي. که د جواري او مستو سره لږ لېمو هم اضافه کړئ، د مخ د غوړ پوستکي لپاره په زیاته اندازه ګټور دی.

۷ـ رومیان او بادرنګ:

په بادرنګو او رومیانو کې بېلابېل ویټامینونه شتون لري چې د مخ غوړ په چټکۍ سره لۀ منځه وړي او د مخ پوستکی روغ ساتي. رومیان مخ ته تازه ګي، نرمښت او ځواني بخښي