د آلمان د کورنيو چارو وزيرې نانسي فايرز د فرانکفورتر الګېماينه ورځپاڼې سره په يوه مرکه کې ويلي: «له پوځه تښتېدلي کسان چې له جدي ګواښ سره مخ کيږي، په عمومي توګه په آلمان کې نړيوال محافظت ترلاسه کولی شي.»
نوموړې وویل: «هر هغه څوک چې په جرائت له رژيم سره مخالفت ښيي او له دې وجې له ستر خطر سره مخ کيږي، د سياسي تعقيب پر اساس په آلمان کې د پناه غوښتنه کولی شي.»
د آلمان د عدلیې وزير مارکو بوشمن د «قسمي بسيج» د هېشټيګ په کارولو سره په تويتر کې ليکلي دي چې «ظاهراً ډېر روسان د خپل هيواد د پريښودو په حال کې دي – هر هغه څوک چې د پوټین له تګلارې نفرت لري او د ليبرالې دیموکراسۍ سره مينه لري، آلمان ورته هرکلی وايي.»
په دې منځ کې د آلمان د بهرنيو چارو وزيرې انالېنا بېربوک د جګړې ضد روسي مظاهره کوونکی ستايلي دي او زياته کړې یې ده چې اوس په روسيه کې دننه هیڅ يو کس هم پر هغه څه چې په اوکراين کې روان دي، سترګې نه شي پټولی، ځکه «اوس هر روسی وګړی په دې جګړه کې د شامليدو له ګواښ سره مخ دی.»
روسيه د ځوانانو ډله ایز وتل ردوي
د پنجشنبې په ورځ د کريملن وياند ديميتري پيسکوف د پوتین تر اعلان وروسته له روسیې څخه قانوني سن ته د رسېدولو ځوانانو د ډله ایزې تېښتې رپوټونه غير جدي وبلل.
نوموړي وويل: «په هوايي ډګرونو کې د ګڼې ګوڼې او د داسې نورو معلوماتو په برخه کې ډېره مبالغه کيږي… په دې اړه ډېر ناسم معلومات موجود دي. موږ باید ډېر احتياط وکړو، څو پر دې موضوع د ناسمو معلوماتو ښکار نه شو.»
د ريزرف عسکرو د «قسمي بسيج» په تړاو د پوتين تر امر وروسته هغو هيوادونه ته پروازونه په بشپړه توګه ډک شوي دي چې روسان یې د سفر له پاره ویزې ته اړتيا نه لري، لکه ارمنستان، ترکیه، آذربايجان او صربستان.
د رپوټونو پر اساس همدا شان د ګورجستان، فنلند، قزاقستان او منګوليا سره د روسیې پر سرحدونو هم اوږده کتارونه ليدل کیږي.
پرو ازول له پوځه د تښتېدلو د منلو غږ کړی
په آلمان د مهاجرو پلوي ټولنې پروازول هم پر هيوادونو غږ کړی دی چې له روسیې او بېلاروس څخه له پوځه تښتېدلو او باوجدانه مخالفينو ته یې پناه ورکړي.
د پروازول د اروپايي څانګې مشر کارل کنوپ د آلمان راينشه پوست ورځپاڼې ته وويل: «د اروپايي اتحادیې د قوانينو پر اساس له يوې داسې جګړې تېښته کوونکي چې له نړيوالو اصولو څخه سرغړونه کوي، د پناه او محافظت حق لري. په دې اساس دي آلمان او اروپا بې له ډېرې بيوروکراسۍ د هغو کسانو منل تنظيم کړي چې په خپلي تېښتې سره یې د روسیې د يرغل پر ضد رایه ورکړې ده.»
د روان کال د فيبرورۍ له ۲۴ نېټې راهېسې آلمان څه نا څه يو ميليون اوکرينيانو ته چې د روسیې د يرغل له کبله په تېښته دي، پناه ورکړې ده. آلمان همدا شان ناراضي روسانو ته هرکلی ويلی دی. د فايرز د معلوماتو په حواله ۴۳۸ ناراضي روسانو چې ژورناليستان هم پکې شامل دي په آلمان کې د پناه د يوې چټکې کړل شوې پروسې څخه ګټه اخيستې ده.
خو نوموړې دې ته اشاره وکړه چې سياسي پناه په اتوماتیک ډول نه ورکول کیږي؛ د عريضه کوونکي په اړه باید لومړی ټولې امنيتي پلټنې بشپړې شي.
د اروپايي ټولنې کمېسيون هم ويلي دي چې هغه کسان چې د روسیې د قسمي بسيج څخه په تېښته دي، په اروپايي ټولنه کې د پناه د غوښتنې حق لري. د مهاجرت په اړه د اروپايي اتحادیې یوې ویاندې انيتا هيپر وويل: «دا يو بې ساری وضعيت دی.» هغې وويل چې غوښتنليکونه به په انفرادي توګه ارزول کیږي.
د چهار شنبې په ورځ د اروپايي ټولنې د بالتېک ساحې غړيو هيوادونو ويلي ول چې دوی به د پوتين د قسمي بسيج امر څخه تېښته کوونکو ته پناه ور نه کړي. د روانې اوونۍ په سر کې استونيا، لاتويا او لتوانيا په روسيه کې د اوکراين له جګړې څخه د درانه کورني ملاتړ له کبله د روسي اتباعو پر وړاندې خپل سرحدونه وتړل.
دویچه ویله
د دعوت رسنیز مرکز ملاتړ وکړئ
له موږ سره د مرستې همدا وخت دی. هره مرسته، که لږه وي یا ډیره، زموږ رسنیز کارونه او هڅې پیاوړی کوي، زموږ راتلونکی ساتي او زموږ د لا ښه خدمت زمینه برابروي. د دعوت رسنیز مرکز سره د لږ تر لږه $/10 ډالر یا په ډیرې مرستې کولو ملاتړ وکړئ. دا ستاسو یوازې یوه دقیقه وخت نیسي. او هم کولی شئ هره میاشت له موږ سره منظمه مرسته وکړئ. مننه
د دعوت بانکي پتهDNB Bank AC # 0530 2294668 :
له ناروې بهر د نړیوالو تادیاتو حساب: NO15 0530 2294 668
د ویپس شمېره Vipps: #557320 :
Support Dawat Media Center
If there were ever a time to join us, it is now. Every contribution, however big or small, powers our journalism and sustains our future. Support the Dawat Media Center from as little as $/€10 – it only takes a minute. If you can, please consider supporting us with a regular amount each month. Thank you
DNB Bank AC # 0530 2294668
Account for international payments: NO15 0530 2294 668
Vipps: #557320
Comments are closed.