آلمان په افغانستان کې د داعش د فعاليت په اړه اندېښنه لري

که څه هم داسي ښکاري چي داعش ډلې په سوریې او عراق کي په پراخه کچه ماته خوړلې، خو بیا هم دغه ډله په بشپړه توگه له منځه نه ده تللې او د هغې څانگي په ټوله نړۍ کي فعالیت لري.

هالدن ونگ وویل چي د داعش خراسان څانگه د دغي ډلي د نورو څانگو په منځ کي د لا راڅرگندیدو په حال کي ده. هغه وویل :په افغانستان کي دغه څانگه له طالبانو سره په وسله واله جگړه بوخته ده، خو «پام یې اروپا ته دی».

هالدن ونگ څرگنده کړه چي د داعش د خراسان څانگه په دغه ترهگري شبکه کي د خپلي رهبرۍ د ادعا د رابرسیره کولو په هدف، په لویدیځ کي د «کفارو» پر وړاندي د برید په لټه کي ده.

هالدن اونگ وویل، په جرمني کي امنیتي چارواکي دې ته پام کوي او هغو لوړو گواښونو ته په پام کي نیولو سره چي د ترهگرو له لوري آلمان ته متوجه دي، «ټولي احتمالي سناریوگاني» په پام کي لري.

په افغانستان کي له داعش سره په جرمني کي د دوو تورنو کسانو اړیکه

په هامبورگ کي په یوه محکمه کي د دوو نوو ځوانانو په وړاندي د حقوقي بهیر ارزونی، په آلمان کي د داعش د خراسان ولایت د څانگي د نفوذ په پیژندلو کي مرسته کړې ده. دغه تورن کسان، یو یې آلمانی-کوزوویی ۱۶ کلن تنکی ځوان او بل یې له روسیې څخه ۱۸ کلن ځوان تبعه دی. دغه په خټه روسی کس په کوچنیوالي کي له خپلي کورنۍ سره آلمان ته راغلی وو.

کشر کس په دې تورن دی چی د یوه چاودیدونکي برید د آماده کولو په حال کي وو، خو وروسته یې خپل تصمیم ته تغییر ورکړ او پر پولیسو یې د چړې برید پلان کړ.

مشر کس بیا د دغه برید په طراحي کولو تورن دی. هغه همدارنگه د داعش د خراسان څانګي له یوه غړي سره، د کشر کس د اړیکو په ټینگولو تورن دی او دا چي هڅه یې کړې تر څو د نوموړي کس له پاره چاقو آماده کړي.

دواړه ځوانان تر محکمې مخکي توقیف کي دي. هغوی په یوه ترهگري سازمان کي په غړیتوب او له هغه څخه په ملاتړ تورن دي.