د طالبانو مشر: د شریعت په سر جوړجاړی نه کوو

هغه ویلي:«د حدودو اجرا هم فرض ده، قصاص هم فرض دی، قطع د ید یانې د لاس پرې کېده هم فرض دي، د مظلوم دفاع او له ظالم څخه د مظلوم حق اخېسته هم فرض دی.»

د طالبانو مشر ته منسوب دغه غږیزه وینا، طالب ویاند ذبیح الله مجاهد پر خپله ټویټر پاڼه خپره کړې او تر څنګ يې اشاره کړې چې وینا د کوچني اختر د لمانځه ادا کولو پرمهال شوې.

هبت الله اخوندزاده وايي، نظام یې شرعي او اسلامي دی او پردې له هیچا سره جوړجاړی نه کوي.

هغه خبرداری ورکړی چې په نظام کې به یې هیڅ ډول «کفري قانون» ته ځای ورنه کړل شي.

ملاهبت الله نه ده په ډاګه کړې چې له کفري قوانینو څخه یې موخه څه ده او دا یې هم نه دي ویلي چې آیا د ده په ټکو «شرعي نظام» په مقابل کې د کوم جوړجاړي وړاندیز ورته شوی او کنه؟

د طالبانو د مشر په دې څه باندې ۲۶ دقیقه یي وینا کې د ښځو د زده کړو او کار په اړه هیڅ هم نه دي ویل شوي.

تر شپږم ټولګي پورته د نجونو ښوونځیو تړل کېدو، پوهنتونونو ته د نجونو پر تګ بندیز، نادولتي موسسو کې د ښځو پر کار تر بندیز وروسته دوی په ملګرو ملتونو کې هم د افغان میرمنو پر کار بندیز لګولی دی.