وږي زړونه

وږي زړونه د ټولنیز ژوند په تړاو د لیکوالې جنیفر روډولف والش د مقالو په زړه پورې ټولګه ده. دا مقالې تر ډېره پر زړورتیا، لیوالتیا او د انساني ژوند په تړاونو بحث کوي. مقالې د ۱۶ اغېز لرونکو څېرو د ژوند اړوند ټکان ورکونکې، لږې اورېدل شوې الهام بخښونکې کیسې او ډېر داسې څه چې خلک یې د ځان په اړه نه وايي دوی ویلي.
دې ټولګه کې یوه مقاله پر دې خبره کوي چې تړاو او تعلق یو مقصد نه دی بلکې یو ناپایه سفر دی چې له غورځو پرځو او ننګونو ډک دی. دې سفر کې انسان تر ټولو لویه لاس ته راوړنه دا لري چې ځان پېژني او زده کړه کوي.
لیکواله پر دې ټینګار کوي چې موږ باید په نړۍ کې د خپل ځای منلو ته زړه ښه کړو که هر څه وي او هر ډول شرایط وي ان که یو څوک له دغو حالاتو او چاپیریال سره ذهني ډول ارام هم نه وي، باید د منلو هنر ولرو او شکایت ونه کړو.
له خپلو هیلو سره لیونۍ مینه وکړئ او د دې جرات ولرئ چې د رسېدو لپاره یې هره لار و ازمایئ. خپل ارمانونه وپېژنۍ او ورپسې شئ.
د ژوند د مبارزې یو اغېز لرونکی هنر د ښکلو خبرو او زرینې وینا اورول دي.
یوه مقاله پر زړورتیا ده. دا هغه زړورتیا نه ده چې موږ له هوښ او فکر پرته د مرګ کندې ته ورټیل وهي. دا زړورتیا د ژوند لپاره ده او لکه چې د بدن عضلات تمرین ته اړتیا لري زړورتیا هم په تمرینولو غښتلې کېږي. زړورتیا داده چې د بې انصافۍ پر وړاندې غږ پورته کړئ، خپل حق چا ته مه پرېږدئ. د ژوبلو احساساتو پالنه وکړئ او د خلکو په لاس نیوي او حق غوښتنې سره نورو انسانانو ته د ژوند کولو الهام ورکړئ.
بریا له خپلو شرایطو سره سمه وګڼئ. دا ټولګه د بریا هغه ټولنیز تعریف ننګوي چې پوړ په پوړ لار راپېژني. وايي خپل کار له خپلو شرایطو سره سم وکړئ دې ته مه ګورئ چې نور انسانان او نوره نړۍ په کومه لاره ځي.
زیان منل د اړیکو او پیوستون دروازه ده. د خپلو ماتو او ناکامیو اړخ مه پټوی، ان زموږ نیمګړتیاوې او ویره نورو ته دا درس ورکولی شي چې پر دغه لار رهي نشي.
د خپلو کیسو څښتن اوسه. هر لیکوال د خپل ژوند په نکلونو او داستانونو نور هڅوي چې وغږیږي، کیسه وکړي او د خپلو غمیزو او خوشاله شېبو اورولو او لیکلو سره د نورو وګړو احساسات وګټي، اړیکي جوړې کړي او بدلون راولي.

هغه غوښتنې شاته کړئ چې زموږ لپاره ننګوونکې دي. پام پر هغو غوښتنو وساتئ چې موږ یې ترلاسه کولی شو او له لار ورته لرو. خپلو غوښتنو ته لومړیتوب ورکړئ، پولې ورته وټاکئ او یو داسې چارټ ورته جوړ کړئ چې له واقعاتو سره سمون خوری.
په هغه ځای کې ژوند وکړئ چې تاسو مني، ستاسو د اورېدو ځای پکې وي، شاباسی درکوي او لمانځي مو .
موږ ته د ډېرو سپارښتنه دا وي چې هومره اړیکي وپالئ چې ورځ پرې تېریږي خو د دې ټولګې سپارښتنه داده چې له هر څه سره چې ستاسو سرو کار او تړاو دی له زړه مینه وکړئ او دومره ریښتیني اوسئ چې خوند ترې واخلئ.
یو ځای لیکي، خواخوږي او زړورتیا هم مهاله وپاله او د خپلې خوښې ژوند وکړئ.

‏