په افغانستان کې د بشري حقونو خوندیتوب لپاره د بېړني اقدام غوښتنه شوې

د بشري حقونو یو شمېر نړیوالو ملاتړو بنسټونو په یوه لیک کې له نړیوالې ټولنې غوښتي چې په افغانستان کې د بشري حقونو د خوندیتوب لپاره بېړنی اقدام وکړي.

د بشري حقونو یو شمېر نړیوالو ملاتړو بنسټونو په یوه لیک له نړیوالې ټولنې غوښتي چې د افغان نجونو او ښځو ستونزو ته پاملرنه وکړي.

د بخښنې نړیوال سازمان، د ازادۍ کور، د بشري حقونو د مدافعینو ټولنه، د بشري حقونو د څار سازمان، د ښځو لپاره د سولې او خپلواکۍ نړیوال فدراسیون او یو شمېر نورو بنسټونو په دې ګډ لیک له نړیوالې ټولنې غوښتي چې په افغانستان کې د بشري حقونو د خوندیتوب په ګډون، د فعالانو د ځورونې مخه ونیسي او په طالبانو د زیات فشار راوستو له لارې افغان مېرمنې په ټولو خبرو اترو کې شاملې کړي.

دا ګډ لیک چې تېره شپه ناوخته د ښځو د نړیوالې ورځې په مناسبت خپور شوی په کې راغلي، په ۲۰۲۱ کال کې د واک له بیا تر لاسه کولو وروسته طالبانو د نجونو او ښځو په حقونو د ظالمانه بریدونو په پایله کې یو جدي بحران رامنځته کړی دی.

په همدې حال کې د افغانستان لپاره د امریکا ځانګړو استازو ټوماس وېسټ او رینا امیري د یاد مناسبت په اړه په بېلابېلو بیانونو کې ویلي چې د طالبانو د سختو، سیستماتیکو او افراطي فرمانونو په وړاندې د خپلو حقونو د دفاع په برخه کې د افغان مېرمنو او نجونو د زړورتیا ستاینه کوي.

وېسټ په خپل ټویټر په یو بیان کې لیکلي چې د افغان نجونو او ښځو له ټولو هغو هڅو او زړورتیاوو درناوی کوي چې غواړي په هر کچه د کار ترڅنګ، تعلیم وکړي څو خپل حقونه خوندي او د ژوند په ټولو چارو کې برخه واخلي.

رینا امیري بیا په خپل بیان کې چې د هغې په ایکس پاڼه خپور شوي ویلي: “موږ د طالبانو د سختو، سیستماتیکو او افراطي فرمانونو په وړاندې د خپلو د حقونو د دفاع په برخه کې د افغان مېرمنو او نجونو د زړورتیا ستاینه کوو.”

د افغانستان لپاره د امریکا شارژدافېرې کرن ډیکر هم ویلي، افغانې ښځې د افغانستان د راتلونکي لپاره اړینې دي.

د سولې د نوبل جایزې ګټونکې او د نجونو د زده کړو فعالې ملالې یوسفزۍ بیا ادعا کړې چې نړیوالې ټولنې په افغانستان کې د ښځو پر وړاندې د زور زیاتي موضوع ته د پام وړ پام نه دی کړی.

اغلې یوسفزۍ د جمعې په ورځ د ښځو د نړیوالې ورځې په مناسبت یوې غونډې ته چې د ښځو د حقونو د یو شمېر مخکښو فعالانو هم په کې حضور درلود، وویل چې د ښځو پر وړاندې د طالبانو سیاست لنډمهالی نه دی بلکې په ډېر دقت محاسبه شوی دی.

نوموړې وویل: “داسې ښکاري چې دا نړیوالې ټولنې ته ډېره مهمه مسئله نه ده. زما په اند دا یوه ډېره مهمه مسئله ده، البته که غواړو طالبان او د هغوی ایډیولوژي وننګو ځکه له افغان نجونو یوازې ماشومتوب نه بلکې راتلونکې اخیستل شوی دی.”

دا په داسې حال کې ده چې په افغانستان د ملګرو ملتونو سیاسي استازولي یوناما همدا تېره ورځ هم په دې افغانستان کې پر ښځو او نجونو د محدودیتونو په پای ټینګار وکړ او تر اوسه د ملګرو سازمان یوازې په تېر څو میاشتو کې دوه لویې غونډې په دې تړاو جوړې کړې دي.