د ښوونځي زنګ (نظم)

د ښوونځي زنګ (نظم)
د هلکانو – د ښوونځي زنګه
نه مې لحاظ کړې- او نه مې ننګه
زما د مکتب وای- ټالۍ شرمېږي
د تا له غږه – د تا له ټنګه
…
ته چې کړنګېږې- دا وارخطا شي
چې اوس به دا هم- په کړنګېدا شي
او بیا به ډلې- مکتبۍ راشي
خو داسې نه وي- غم یې سېوا شي
…
ښوونځی مې بند شو – چې شوم اووم ته
ښځې بودن یم- تړلې بم ته
ورور سره یو ځای – به وم روانه
خو اوس یوازې- درومي نهم ته
…
د هلکانو – مکتبه خلاصه
صدقې ورکړه – شکرونه باسه
نه چا تړلی- نه چا ښکنلی*
ور دې پرانېستی- خلاص له بازخاصه
…
اوس ما ته ګوره – ښوونځيه وروره
زه او بکسه مې- پړمخ نسکوره
د دنیا ښځې- سپوږمۍ ته خېږي
خو زما منزل دی- کور نه تر ګوره
…
رالویوي مې- ګو بېسواده
دا خو اوبال دی- دا خو ګناه ده
وطن بیمار شو- وطن انپړ شو
نه به ډاکټره- وي نه استاده
…
بیا که ناروغ کړي- خدای پاک پلرونه
ټول نارینه او- دښتې او غرونه
زه به سر توره – غوړوم چا ته؟
لمن، ټېکری او- لپې، وزرونه؟
…
اې زما د خوار وای- وطن ښوونځیو
هلکان روزئ – جار، په غورځیو
خو پرې یې نه ږدئ- چې داسې ستر شي
چې نجونې منع- کړي له ټولګیو