دا وړه وړه ټکا، بده ګواهي ورکوي

له همدې سره جوخت په افغانستان کې د حکومت پر ضد دسيسي، ډلې، اتحادونه، ايتلافونه او نور بلا بتر جوړ شول، په يوه وار يې سر راپورته کړ او لا هم کېښناستلي نه دي.
کيسه پر همدې ځای نه پاتې کېږي، بلکې په دويم اړخ کې طالبان هم د پخوا په پرتله د جګړې رخ بدلوي.
په غور او فارياب کې د ولسواليو سقوط، پر روغتون بريد، د بندونو ساحې ته ځان نږدې کول او د جګړې پر مهال د وحشت انتها د طالب په جګړه کې نوي بدلونونه دي.

په دې سربېره، څو ورځې وړاندې په ښوراوک کې د اوبو يوه ذخيره په بمونو الوځول او وړمه شپه په نيمروز کې د کمال خان بند پر تاسيساتو بريدونه چيغې وهي چې طالب د ايران په فرمايش دا مهال توپک غاړې ته اچولی دی.
طالبانو وړمه شپه د نيمروز په چهاربرجک ولسوالۍ کې د کمال خان بند پر تاسيساتو باندې د لوېديز له خوا بريدونه وکړل، خو له نېکه مرغه سرتېرو نيم ورڅخه ووژل او نيم نور يې په تېښته کړل.

د تر لاسه شويو مالوماتو په اساس، د دغو بريدونو پر مهال طالبان سيمې ته په پرمختلليو موټرو کې راغلي وو او د شپې دوربينونه هم ورسره وو.
هلته په فراه کې هم ايرانيانو لاس اچولی، درګرده د طالبانو کورنۍ ايران ته باسي او بيا يې ځوانان په وسلو بار بېرته د جګړې له‌پاره رالېږي.
ايران هلته هڅه کوي هم د بخش اباد بند د جوړېدو مخه ونيسي او هم د ټاپي پروژې مخه ډب کړي.
حکومت چې اول د بندونو د جوړولو وس نه درلود، ولې يې اعلانونه کول چې بندونه جوړوي.

چې د ساتلو وس يې نه لري، ولې د سيمې حساسيتونه راپاروي، ولې د جګړې اور ته په دې توګه لا نور هم تېل ورپاشي.
تر هغه وخته بايد هر څه پټ پاتې وای، هر وخت چې يې په ځان کې د بندونو جوړولو زور او د ساتلو ځواک پيدا کړی وای، نر غوندې دي يې بندونه جوړ کړي وای، بيا به يې چا مخه هم نه شوای نيولای.
اوس چې هر څه شوي، شوي دي، په تېرو اوبو پسې بېل وړ ګټه نه کوي، اوس بايد حکومت دغې برخې ته بشپړه پاملرنه وکړي.

حکومت بايد ياد وساتي چې په هيڅ صورت يې پاکستان او ايران د بندونو جوړولو ته نه پرېږدي. د دغو دواړو هېوادونو او په هېواد کې دننه د دوی د شته اجيرانو سپين سترګۍ ورځ تر بلې پسې زياتېږي. څو ورځې وړاندې طالبانو هم د ښوراوک د اوبو ذخيره الوځولې وه، هم يې چيغې وهلې چې هلته کله اوبه شته. وړمه شپه يې د کمال خان بند پر تاسيساتو بريدونه کړي او بيا په سپين سترګۍ چيغې وهي چې نه، پر پوستو يې بريدونه کړي دي.

اوس چې د بندونو جوړولو نغارې وهلې شوې دي، دا وړه وړه ټکا هم بايد جدي ونيول شي. په ټول زور بايد د بندونو او د اوبو د ذخيرو ساتنه وشي او ټول پام د بند جوړولو چارو ته واړول شي.
اوبه اوس زموږ په ابرو او ناموس اوښتې دي او ساتنه يې په ډېر تاوان ارزي. که په دې برخه کې بيا هم حکومت لوټه ږدي او تر وياله اوړي، نه به بندونه جوړ وي، نه به د حکومت خښتې پاتې وي.

سرخط ورځپاڼه