د یوې ورځې او شپې واکمن او د یوې ورځې او شپې ملکه/ ډاکټر لطیف یاد

که چا دهند دمغولو ددورې تاریخ لوستلی وي نو تاسو ته به جوته شي چې په هندوستان کې دیوې ورځې اوشپې واکمن ( پاچا) او دیوې ورځې او شپې ملکه هم تیره شوې ده .
کله چې د۱۵۳۹ زیږدیز کال دجون دمیاشتې په ۲۶۶ نیټه دپښتون شیرشاه سوري اودهند دمغولي واکمن همایون تر مینځ دبیهار په چوسه کې دګنګا دسیند پر غاړې جګړه وشوه نو همایون دشیرشاه له لاسه ماتې وخوړه نو نږدې و چې همایون دګنګا په سیند کې ډوب شي نوپه دغه وخت کې د یو سقاو په مرسته چې نظام نومیده داوبو نه راوایستل شواو دمرګ نه وژغورل شو او کله چې همایون تر دغې جګړې وروسته خپل بایتخت آګرې ته ستون شو نو نظام سقاو یې دیوې ورځې اوشپې لپاره دده دهغه ښیګڼې په وجه چې له ده سره یې کړې وه دهندوستان پاچا وټاکه او سکه یې دده په نامه جاري کړه او په دې توګه نظام سقاء دیوې ورځې لپاره دهندوستان پاچا شو .
همداراز کله چې دهمایون پاچا زوي اکبردهندوستان واکمن و نو دده زوی شهزاده سلیم چې په جهانګیر سره مشهور و ددربار دیوې وینځې ( کنیزې ) سره چې انارکلي نومیدله مینه پیداشوه. دانارکلي نڅا ، انداز او ښایست دشهزاده سلیم پام ځانته ورواړاوه او خپل زړه یې پرې بايلود او پرې مین شو. وروسته یې پلار اکبر دخپل زوی شهزاده سلیم دمینې په راز خبر شو او غو ښتل یې چې انارکلي شهزاده سلیم ته واده او دهندوستان ټولواکمنه ( ملکه ) ترې جوړه کړي ، خو بیا اکبر پاچا دخپلې مور حمیده بانو په حساسیتونو پوه شو ، ځکه موريې نه غوښتل چې دهندوستان ټولواکمنه ( ملکه ) دې ددوی ددربار او حرم یوه وینځه وي. د شهزاده سلیم او دانارکلي مینه نوره رسواشوه او اکبر انارکلي دلاهور په یوه خطرناکه زندان کې قید کړه ،خو د هغې سره دشهزاده سلیم دمینې برکت و چې دایې په زور له زندانه خوشې کړه او له ځانه سره یې په یوه پټ ځای کې وساتله .دا نارکلي پر سر دشهزاده سلیم او اکبر پاچآ اړیکي دومره خراب شول چې شهزاده سلیم دخپل پلار سره دجګړې اعلان وکړ .خو په دغه جګړه کې شهزاده سلیم ماتې وخوړله .اکبر پاچا خپل زوی سلیم ته دوه شرطونه وړاندې کړل چې یا به انارکلي ورته سپاري او یابه دمرګ سزا مني . انارکلي چې کله د دغه شرایطونه خبره شوه او دشهزاده سلیم مرګ یې نه شو زغملی نو پخپله داکبر پاچا دربار ته ورغله او ځان یې اکبر پاچاته تسلیم کړ.اکبر پاچا انارکلي ته وویل چې تا خو ژوندۍ نه پریږدمه خو مخکې تر دې چې تا ووژنمه خپل یو شرط ماته ووایه چې
ویې منمه . انارکلي ورته وویل : چې یوازې یو شرط لرمه او هغه دا چې غواړم چې دیوې
شپې لپاره دشهزاده سلیم سره واوسمه او دیو ې شپې لپاره د هندوستان ملکه شمه . اکبر پاچا دانار کلي داشرط ومانه او هغه دیوې شپې لپاره دهندوستان ملکه شوه ،خو سبا سهار اکبرپاچا خپلو پوځیانو ته امر وکړ چې انار کلي ونیسي او ژوندۍ یې دخښتو دیوال ترې تاو کړ او په دې توګه انارکلي دخښتو په دیوال کې مړه شوه .ویل کیږي چې دانارکلي نه په هغه ځای کې دخښتو دیوال راتاو شوی وچیرې چې اوس دلاهور د ښار دانارکلي بازار دی